عبدالله سلمان

بيانات اضافيه [ + ]

رقم العضوية : 52674  تاريخ التسجيل :  01 2016  أخر زيارة : 13-06-2021 (08:19 PM)  المشاركات : 1,242 [ + ]  التقييم :  14  الدولهـ  الجنس ~

لوني المفضل : Blue

السلام عليكم ورحمة الله وبركاته


أخي العزيز ... السؤال هو هل تريد التغيير في حياتك ؟


ممتاز ... التغيير يبدأ من نفسك .. أما تنتظر تغيير كل العالم من حولك وبدون أي تغيير منك فهذي إغسل إيدك ببنزين وفلاش

لابد أول شيء يكون عندك نظرة واقعية وتقدير متوازن للأمور اللي لك واللي عليك


إبدأ بنفسك أولا من الناحية الدينية .. كيف ترى نفسك ؟
ومن ثم من الناحية الإجتماعية .. وكونك طالب جامعي من المستحيل إنه ما توجد فرص لتكوين صداقات ... غير إنك ذكرت في معرض كلامك عن أبوك إنه مو مثل آباء أصحابك ..!!


عندك أصحاب أو لأ ؟؟ أو إنه في الحقيقة عندك أصحاب ولكن مو معجبينك والأب مو معجبك والعائلة مو معجبتك والسيارة بخمسين ألف ريال مو معجبتك وال 500 ريال كل شهر من الوالد مو معجبك غير مكافئة الجامعة وآكل شارب نايم على حساب الوالد مو معجبك بعد


لابد تكون واقعي حتى يكون حكمك على الأمور حقيقي ... أما إستمرارك على الأفكار هذي بيتعبك ولا راح تتطور إلا للأسوء .. لأن الناس ماهم عايشين على مزاجك وتصورك


التغيير لابد يكون منك أنت ... أولاً الوالد مو مجبور يشتري لك سيارة بخمسين ألف ولا بالمصروف الشهري ... لأن واجبه عليك هو إنك تأكل وتنام وتتعلم لين تصير رجل تعتمد على نفسك ... ولابد إنك تثبت وجودك له وتكون ناضج فكرياً وتتعفف عن الإلحاح عليه ووصفه بأوصاف لا تليق أولاً كونه أبوك اللي لحم أكتافك من خيره وإلى اليوم ... وثانيا لأنه رجل متكرم عليك بسيارة بمبلغ وقدره ... غير إنه إلى الآن يرش عليك فلوس وإنت رجل بشارب ولحيه


كلامي هذا أنا متأكد إنك ترى إنه قاسي .... ولكن صدقني واقعي .. وهذا اللي المفروض إنك تحطه بين عيونك


إنت رجل عندك مشكلة ولابد إنك تكافح من أجل التغيير وأول الطريق هو إنك تتفهم إن المشكلة منك أنت شخصيا مو من الناس ولا من العائلة ولا من الأب ... بالعكس ظروفك ممتازة من الناحية المادية ومن ناحية القدرة على تكوين صداقات جديدة وكثيرة كونك طالب جامعي وتملك المال وتملك السيارة وتملك المنزل وتملك الوقت ... أما لومك للوالد وهو متكرم عليك وجحودك لأصدقائك مره تذكرهم ومره تنكر وجود أصدقاء ومن ثم لومك للمطب بتخريب سيارتك وانت تسوق بسرعة كبيرة فصدقني لا المطب دري عنك ولا الوالد دري عنك ولا أصدقائك اللي تنكر وجودهم دروا عنك .... أنت ما تتعب إلا نفسك في الأسلوب هذا


تذكّر .... مجرد ما تبدأ بتغيير نفسك ونظرتك للأشخاص من حولك راح يبدأ الكل بالتقرب منك ... أما الأسلوب المعيشي هذا والحكم على الأمور بهذي الطريقة طبيعي ينفر الناس منك ... كيف الوالد عينه على مكافئة الجامعة وهو يصرف لك 500 شهري وسيارة بخمسين ألف !!!؟ ... ممكن هو ينتظر الفرصة إنك تثبت وجودك ومن ثم يتكرم عليك مرة ثانية بهدايا أكبر .. مع انه المفروض انت حاليا تفكر كيف ترد الجميل للوالد وتكافئه .. لأنك مو طفل .. إنت رجل حاليا وانظر للغالبية من الشباب في مثل سنك وكيف انتاجيتهم في الحياة وطريقة تفكيرهم ووزنهم للأمور خصوصا تجاه العائلة


ما عندي زود ... لكن ركّز الله يوفقك على نفسك وعالج أفكارك واترك الناس