السلام عليكم
المرض بدأ عندي من 4 شهور تقريبا وبدأ بشكل مفاجئ . ومكنتش فاهم اي حاجة ايه اللي بيحصلي وليه.
حياتي الطبيعية كلها اختفت . ووصلت لمرحلة اني حاسس اني سكران ودماغي متخدرة .. مبفهمش اي حاجة ومش عارف رايح فين ولا بعمل ايه ومبعرفش اتكلم مع حد ولو اتكلم معرفش هقول ايه دة بقا غير الدوخة وزغللة العين 24 ساعة والنسيان الغير طبيعي بالظبط شعور السكران ان دماغه فااااضية خالص . غير مرحلة اني حسيت اني خلاص هوصل لمرحلة الجنان او هيحصلي حاجة . بتمر الايام والحالة مبتروحش . بحاول اخرج نفسي من الحالة دي باي طريقة عشان محدش هيساعدني . مروحتش لدكتور نفسي لكن معظم الدكاترة في التخصصات المختلفة قالو ان دة اكتئاب . وعرفت ان الادوية ملهاش لزوم .عشان كدة قررت مروحش لدكتور او اخد اي ادوية.
الحل اللي وصلتله يتلخص في جملة .

دوام الحال من المحال
وافعل عكس ما تأمرك به نفسك

خايف تخرج الشارع . لا اخرج . مش عايز تكلم فلان او مش طايق او مش عارف هتقول ايه .. لا كلمه وقول اي حاجة
حاسس ان الناس بتبصلك . دة شعور انت اديته لنفسك . مستحيل ملايين او الالاف هيسيبو اللي فيهم وحياتهم وهيركزو معاك انت
اي فكرة سيئة عن نفسك او فكرة تضرك . بكل بساطة متحاولش تفكر فيها . حقرها وخرجها من دماغك.
مبتضحكش او مش عارف تحس احساس السعادة واحساس الضحك من جوة . اضحك وخلاص علي اي موقف
وما دام الحالة دي حصلت فجأة . يبقي اكيد هتنتهي فجأة . لكن حاول تفتكر علي قد ما تقدر تصرفاتك قبل المرض وحياتك الطبيعية وحاول تعيشها حتي لو مش مبسوط
لان في كل الحالات انت مش مبسوط.

انا بحاول اطبق الكلام دة وبيكون صعب عليا جدا . لكن امبارح حصل حاجة غريبة . اني حسيت اني طبيعي وبتكلم عادي ومع الاحساس دة حسيت ان كدة عقلي ضرب بقا . لكن لما فكرت شوية قولت لا دي حياتي الطبيعية دي طريقتي زمان وعشان اتعودت علي اللي انا فيه حسيت ان الانبساط دة غريب عليا.
كل اللي عايز اوصلو ليكم ان محدش في الدنيا هيساعدك غير بكلمة معلش و ان شاء الله خير . وشوية علاج
لكن العلاج الحقيقي جواك .كل اللي عليك انك متفكرش في كل صغيرة وكبيرة . متفكرش في كل تصرف بتتصرفه .
وربنا معاكم ومعايا .