المشاركة الأصلية كتبت بواسطة عبدالله سلمان

الله يشفيك ويعافيك

هو دور المعالج السلوكي يرتب معك كثير من الأشياء ويشرحها لك ويساندك

وطبيعي انك ما ترتبين أمور القولون دائما .. ولكن المهم تتفهمينه وتتفهمين نفسك والأشياء اللي تصير من حولك وطاقتك في التحمل والتعامل معها


لما نصير بوسط المعمعه والضيق ما نقدر نتعامل مع ضغوطات مختلفة ومن كل جانب في نفس الوقت ... على الأقل إذا ما فيه أحد حولنا يتفهمنا ويساعدنا يجي دور المعالج السلوكي بتوجيهاته وتطميناته ويرسم لك الإستراتيجيات اللي تمشين عليها


صدقيني مو ضعف اللي تعانين منه .. ولكنه شيء متراكم لذلك يصير أقوى منك .. وأضرب لك مثال بسيط ... لو أطلب منك تشيلين كيلو من البرتقال بكل سهولة بتحملينه معك ... ولكن لما أعطيك كرتونين فوق بعضهم وأحمّلك الأمانة بينهد حيلك ... لذلك لابد إنك تنزلين من الأعباء النفسية والضغوطات المتراكمة عليك وتنقلينها حبه حبه ... كيلو كيلو وتتعاملين معها ... مو على طول شايلتها معك وين ما رحتي


ما ألومك لأننا في وسط المعمعه نفقد التركيز ونحس بقلة الحيلة ... ومن الخوف نحاول ما تتفلت الأمور من بين ايدينا وتصير الهموم أضعاف والأحمال تتراكم .. ولما نلتفت للناس نضيق أكثر انه ما فيه احد يشيل هالأشياء معنا ويساعدنا


لو انها أشياء مرأيه كان ممكن أحد يساعدنا ويشيل معنا واحد من الكراتين ههههه ... ولكنها أشياء ما تنشاف هموم وأفكار ووساوس وآلام قولون ما عرف لها الطب علاج ... لذلك اللي حوالينا ماراح يتفهمون هالشيء ابدا ... لذلك أول خطوة هي انك لا تتعبين نفسك وتشرهين على انسان متعافي .. لا تنتظرين ولا تعتمدين على أحد ما يعرف أبعاد معاناتك


والخطوة الثانية تكون في محاولة التقليل من آثار القولون النفسية عليك لفترة معينة ... من شان تقدرين تاخذين نفس وتركزين على مشكلة ثالثة وتتعاملين معها وتتفهمينها


وبالترتيب والهدوء راح تكتشفين انك كل فترة تعاملتي مع شيء وتفهمتيه وخففتي منه .... لا تنتظرين مرحلة الإستسلام والإنطواء وإغلاق الباب على الحياة كلها


ابحثي عن معالج سلوكي محترم يرتب ويتابع معك ويعطيك التطمينات الكافية والفهم الكافي لكل أمورك .... هي في النهاية أغلبها حرب فكرية


أنا نحفت حيل ... ولكن من تترتب أمورنا إن شاء الله نضرب بالعسل والحلبة والمرقوق والحلويات لين ما ننطج

..