المشاركة الأصلية كتبت بواسطة عبدالله سلمان

السلام عليكم ورحمة الله وبركاته


قرأت عدة مواضيع لك .. والله يشفيك ويعافيك أختي ... وقبل أي خطوة تسوينها ياليت تكتبين كل كل الأعراض النفسية والجسدية اللي تمر فيك .. وبالتفصيل الممل ... المشكلة قفلوا صندوق المحادثات هنا

ولكن أرجوا منك يا اختي إنك تكتبين كل اللي تعانين منه نفسياً وجسدياً هنا .. خوذي راحتك بالرد وأكتبي لو خمسين سطر

أنا قرأت بعض الأشياء اللي كتبتيها وبعض الردود عليك ... أهلك ما يبون دكتور نفسي ولا أدوية .. إنتبهي تسوين شيء من وراهم ثم والله إن تندمين لأنك أساساً محتاجة أهلك .. أي أحد يكتب لك هنا بالمنتدى ويسهل لك أمور الدواء النفسي مع إحترامي له ما فكّر كويس

وكان بإمكانك تسألين ... هل أخذوا الدواء من دون علم أهلهم ؟ هل أخذوا الدواء وصارت أمورهم تمام على طول ؟ هل تشافوا نهائيا ؟ هل تشافوا بعد سنة أو سنتين ؟
حطي في بالك إنه من الممكن إن الدواء يدعس فيك خمسين متر للأسفل في البدايات ولفترة ممكن توصل شهر أو أكثر .. هذا إذا كان هو الدواء المناسب ... وممكن يدعس فيك 200 متر إلى الحضيض إذا ماكان هو الدواء المناسب .. وممكن تقعدين سنين وأنتي تجربين في الأدوية ومن دواء لدواء ... وكل كل كل الشعب هنا عارفين هالشيء .. ما فيه نتائج مضمونة من شان تاخذين الدواء من دون علم أهلك


فيه ناس للأسف سنيييين تفحط في عالم الأدوية دون شفاء .. ومعاناة في معاناة الله يشفينا ويشفيهم ويسعدنا ويسعدهم


أنا طاااالبك طلبه يا أختي ... فكري بهدوء وتماسكي هالفترة .. اكتبي أعراضك كلها من أصغر شيء لأكبر شيء ... وتمنيت لو الصندوق موجود تكون فيه المراسلة فورية

وأي أحد يقولو لكل روحي من ورا أهلك والله والله والله ما صفط لك الخير .. ولو إني أدري إن قصده يبي لك الخير .. بس ماهو كل من نصح توفق بالنصح


إذا أنتي إنسانة تبين تكافحين وتتحسن أمورك خوذي كلامي ... تبين تنسدحين ولا تكافحين وبس تبلعين أدوية براحتك

ولو إن الأدوية في وضعك ممكن تتسبب لك في أزمة أسرية ونفسية تتعبك أكثر وأكثر وأكثر .. شوفي مواضيع الرجال هنا طول بعرض وكل واحد فلوسه في جيبه وسيارته تحته ويطلع ويجي على كيفه ومع ذلك يتعذبون في رحلتهم في عالم الأدوية .. كيف انتي لا سيارة ولا هو على كيفك تروحين وتجين


شوية هدوووء وعقل الله يرحم والديك .. وربي ما ألومك بسبب اللي تمرين فيه ولكن مع ذلك صدقيني إنتي أقوى وتقدرين تهدين شوي وتفكرين بمنطقية أكبر

وربّي وربّي لو حتى يسمحون لك أهلك بالأدوية .. ما راح تنفعك دون دعم وتفعيل الأفكار الإيجابية والقضاء على الأفكار السلبية اللي عندك ... ونصيحة مني .. لااااااا تدخلين مواضيع هنا فيها إعتراض على قضاء الله .. طبيعي معك وسواس يشتغل مخك مع أفكارهم .. إنتي محتاجة للتفاؤل والأفكار الإيجابية والهدوء والفرحة ... مو محتاجة تشوفين هم وكدر وملل ويأس وأحزان وشوشرة


وإذا تعتقدين إنك الآن بالحضيض .. إسمحي لي أقول لك ما عندك فكرة عن حجم القوة والإمكانيات اللي يملكها الإنسان في داخله ... فقط تحتاج من يبرزها ويظهرها ويكافح من شان نفسه
وإذا أحد قال لك استخدمي الأدوية .. قولي وقف لو سمحت .. كم استخدمتها سنة ؟ وكيف وضعك الآن ؟ وقبل شهر ؟ وقبل شهرين ؟ وايش تتوقع وضعك الشهرين القادمة ؟ وهل تمر عليك إنتكاسات ؟

من حقك تسألين هالأسئلة لكل شخص يجاوبك .. وتسألينه على أي أساس نصحك بالأدوية


لا تعلقين أملك بالأدوية النفسية .. تعلقي بالله أولا ثم بعملك على نفسك وكفاحك للتخلص من هالحالة اللي تمر عليك ... وعلى فكرة إنتي في البدايات وبإذن الله أمورك تتحسن دون الحاجة إلى لف ودوران من ورى أهلك

...