السلام عليكم

حبيبتي اسفة كنت ناوية ارد عليكي من امس بس حصل لي ظرف فاتاخرت

انا مكة فراح اقلك ايش عملك

اولا بعد ما رحت للشرطة وعرفت المطلوب واخدت خطابات التحاليل رحنا لمستشفى الولادة مع بعض وعملنا التحاليل نفس اليوم عشان تطلع النتايج في واحد يوم
بعدها تقريبا باسبوعين اظن كان يوم ربوع رحت للولادة واعطوني رقم نتايج التحاليل تكون هي اصلا راحت من عندهم للشرطة فالرقم عشان تراجعيهم بيها
بعدها رحنا للشرطة باالاوراق كاملة كان يوم احد، انا وبابا و خطيبي (انا سعودية وهو لبناني) وقعنا عالاوراق وكل شي بس لان التحاليل ما وصلتهم فاضطريت اروح لهم تاني يوم التلوت لان لازم لازم تستلم الاصل ويبقى الى يوم العقد في المحكمة
فنصيحة خليها تروح للشرطة بعد ما تطلع نتايج التحاليل بعدها باسبوع
بعد كده الاوراق تروح لامارة مكة تتصلي عالشرطة تقريبا بعد عشرة ايام عشان يعطوا رقم الصادر
لمن تتاكد ان الاوراق وصلت الامارة لازم الاب والخطيب و اتنين شهود سعوديين يروحوا عشان يوقعوا عالاوراق تاني ويعطوكم رقم المعاملة عشان تراجع بيها في الموقع
وبعدين على حسب يا تروح للرياض في حالة اذا الاجنبي مو من مواليد السعودية او اذا كان من جنسية غير عربية غير كده لمن تخلص من الامارة تروح الاوراق للمحكمة علي طول
بالنسبة لي خطيبي مو من مواليد السعودية فراحت اوراقي للرياض وبسبب اوراق ناقصة راحت ورجعت مرتين ودحين هي في الشؤون الامنية
بدات كل شي من محرم تقريبا

اذا في اي استفسار انا موجودة للخدمة

والله يوفق صحبتك