المشاركة الأصلية كتبت بواسطة عيون متفائلة

بعدين انا ليش قلت يعلمها قبل لاني حطيت نفسي مكانها و انقلب كل شيء على راسي بعد الزواج بسببه و بسبب اهله .



اول شيء غير انهم ما علموني ، الطامة الكبرى انه ترك علاجه من اول يوم زواج فجأة و بدون تدرج و جات الانتكاسة

كلها على راسي عشتها بحذافيرها و بكل نكدها و انا اصلا مدري انه مريض و يتعالج و فوق ذا ترك علاجه و انتكس




اسوأ انواع المعاملة شفتها شكوك و استقعاد و طولة لسان و نكد لين وصلت لمد اليد هنا قلت ستوب و تركته ،

بعدها اعترف لي انه كان مريض و يتعالج و مع ذلك رجعت بشرط يكمل علاجه و وافق لكن هو من عدم حسن

التصرف اللي فيه علم اهله انه ابلغني انه مريض و رجع لعلاجه ، و ليتهم قالوا كثر الله خيرها الاجودية صبرت



لا الا انواع الحروب اللي شنوها علي مدري جهل مدري مكابرة على المرض ، و اقعدوا يقولون ولدنا ما فيه شي

و صاروا يحرضونه الحريم على ترك العلاج و اذيتي و غير نقل الكلام بواسطته بيني و بينهم و صار الشرار نار



و هو للاسف ما له كبير لانه يتيم ، ما في رجل ينحكي معاه ، ما غير الحريم يحدرونه و يسندونه لين اشتريت راحة بالي

و استخرت الله في الانفصال و تركته ، و الحمدلله على كل حال

الحمدلله ما اثمرت ذيك المصيبة ضحايا و الا كان مت قهر و كمد عليهم اللي ذاك ابوهم و ذول اهله



لذلك مافي مثل الوضوح و سر الزوجين ما يظهر و قرارتهم بالاتفاق بينهم و من روسهم



بعدين ذاك شكيت ان اللي كان فيه فصام ما هو اكتئاب و وسواس مثل ما قال ، لان انتكاسة الفصام شينة على الشخص

و على اللي حوله


اما الرهاب و الوسواس و باقي الامراض النفسية سهل التعامل معها طالما الشخص مواظب على علاجه و حتى انتكاستها

تخلي عدوان الشخص على ذاته بحيث يزيد المه النفسي و عذابه


ما هو مثل الفصامي اللي اول ما يقلب يقلب على اللي حوله لاني عشت ذي المراحل في مرض اخوي الله يعافيه


بس حتى انتكاسة اخوي و عدوانيته كانت مغلفة بالطيبة بدون خبث و نقل كلام و استقعاد

يكفي انه كان يعتذر بعدها مباشرة و يحب روسنا و يدينا

مو مثل اللي شفته و العياذ بالله



و المراة يوم يكون زوجها طيب و نشمي بس مبتلى تبي تتحمله لا تخاف

طيبة قلبه تبي تخلي الحياة تستمر ..



و الحياة تبي تستقيم بالتغاضي و تمشي بالتراضي


و اسال الله الكريم ان يوفقنا وياك لما يحب و يرضى و يوفق جميع المسلمين اللهم آمين