المشاركة الأصلية كتبت بواسطة عبدالله سلمان

السلام عليكم


الله يشفيك ويعافيك والجميع أخوي جاسم .. أنا الحمد لله تشافيت من الوسواس والإكتئاب ولله الحمد بدون أدوية .. وتجربتي موجودة في قسم الوسواس بإمكانك تشيك على التسجيلات هناك .. ورغم انه يفوتني الشيء الكثير إلا اني أتدارك بعض الأشياء وأكتبها بالردود وان شاء الله أعيد تنزيل التسجيل بشكل أفضل من الحالي ويكون متكامل


أول شيء أحب أشكر اخوي الكبير أبو عمر على المنتدى اللي جمعنا وأنا عن نفسي إستفدت كثير منه في الشفاء .. و أسأل الله إنه يجعله في موازين حسناته ويسعده ولا يريه مكروه


المنتدى مفيد جدا في إن الإنسان يفهم مشكلته ويستفيد من تجارب الغير ... ولكن أنا أنصح دائماً الشعب هنا إنه ما يسنتر بالمنتدى 24 ساعة .. لأن الخروج من هنا صعب جدا جدا .. لذلك لابد ما يكون تواجدك مقنن ولا يقتصر فقط بالحديث عن الأمراض والبلاوي


استفدت كثير من ناس هنا عسى الله يسعدهم .. وجلست فترة طويلة أدخل المنتدى بشكل يومي ولكن ما أدخل قسم الوسواس نهائيا .. وأغلب وقتي إما في صندوق المحادثات أو في قسم الفضفضة .. تلقى بشر تتحدث معهم بعيد عن المرض و تطلع من الجو


أما 24 ساعة أحاديث عن الحالة المزاجية والأدوية والمشاكل راح تتعب نفسك أكثر وأكثر ... وخصوصا الناس اللي يعانون من الوسواس .. تذكير يومي بمخاوفهم وإحباطاتهم و كدرهم


على الأقل الإنسان إذا ماهو قادر يطلع من الجو وأفكاره خارج المنزل .. يطلع من الجو هنا في المنتدى .. وفي النهاية لازم نتقبّل إننا ضروري نندمج مع العالم ولا ننطوي على أنفسنا قد ما نقدر .. غير عن الأشياء الأخرى اللي تساعد على الشفاء من تغذية ورياضة وأذكار وعبادة ونظام حياة جديد يغير فيه الإنسان كل شيء حتى في نظرته للحياة ومفاهيمه الخاطئة .. ممكن تقرأ كلمه هنا من إنسان تغير مفاهيم كثيرة عندك ما تحصلها عند معالج سلوكي .. وممكن تقرأ كلمة من إنسان هنا تزيد مرضك وتخسف فيك لسابع أرض .. بعض المواضيع والردود لابد تمر عليها مرور الكرام


أهم شيء إنك تصحى كل يوم وأنت موقن إن الشيء اللي تمر فيه هو شيء مؤقت .. إبتسم مهما صار وانا اخوك لأن أمر المسلم كله خير .. وكل شيء في هالدنيا مؤقت .. وأنت من القلّة في هذا العالم اللي موعود بالجنّة اللي لا فيها لا مرض ولا موت ولا ضيق ولا إحتياج مادي ولا عاطفي وكل أمنياتك محققة .. قلت لك القلّة لأن سكان الأرض 7.5 مليار .. منهم 1.5 مسلم فقط .. الباقي 6 مليار يعبدون الحجر والشجر والشمس والقمر والملحد ووو الخ


يقول نبينا عليه الصلاة والسلام .. يا معاذ .. من قال لا إله إلا الله دخل الجنّة .. تفائل بالدنيا وبالآخرة وانا اخوك .. والحياة هذي مؤقتة عشها بما يرضي الله ولا تهتم بالبشر وآرائهم وتعاملهم .. والله لا يكلف نفساً إلا وسعها لا تيأس في حال تقصيرك ولا تغتر في إجتهادك وصبرك .. بالنهاية كل شيء نحصل عليه يكون برحمة الله ومنته سواءاً في هالدنيا أو في الجنّة .. عش ما بين الخوف والرجاء بدون غفلة و تفريط وبدون يأس وخوف وجلد للذات


أدري والله إن المرض متعب .. والأفكار الكئيبة والوسواسية والقلق قهري ولا هو باليد .. ولكن مع ذلك إفتح لك نوافذ ولا تنطوي على الهمّ .. الله يراك و أرحم فيك من أمّك .. وأنا أكلمك عن أشياء لا تقبل الجدل .. الجنّة و رحمة الله و عطفه وتدبيره أمور لا تقبل الجدل


وأنصح الجميع بتغيير روتين حياتهم والإهتمام بالتغذية والرياضة .. هرمون السعادة ( السيروتونين ) 90% يتم إنتاجه في الأمعاء .. صحة جهازك الهضمي لها دور كبير في حالتك المزاجية .. والتغذية والرياضة لها دور في صحة جهازك الهضمي .. الفلورا ( البكتيريا النافعة ) في جهازك الهضمي لها دور كبير صحة جهازك الهضمي والإستفادة من الغذاء .. نوعية الأكل وإدخال الطعام على الطعام والسكاكر والكافيين والمواد المصنعة وقلّة الألياف تقضي على التوازن البكتيري في جهازك الهضمي .. المضادات الحيوية تقتل البتكيريا النافعة والضارة ولا تفرق بينها ... فلا تسألني بعد كل هاللخبطة عن هرمون السعادة


وعسى الله يسعدك والجميع ويرزقنا نعيم الدنيا والآخرة .. ويلهمنا السكينة والطمأنينة


...