نفساني - عرض مشاركة واحدة - عندما تفشل....... وتسمع ان فلان اخر......!

17-07-2017, 11:29 PM

قريت موضوعك كامل..مريت بتجربه فظيعه واثرت فيني قصتك والله..اعتقد اسمك مب خالد لكن من كثر محاولات الأنتحار شعرت انك خالد مخلد في الدنيا ! واضح عليك انك شخص ذكي و عقلاني..واسألتك ماقدروا يجاوبون عليها الأعضاء لأنها منطقيه وفي محلها..شوف يا اخوي..انا مريت بنفس تجربتك في محاولة الأنتحار..وما أقولك السالفه كتحدي من اسوء في محاولة الأنتحار انا ولا انت ! لأن الظروف اللي مريت فيها انت تبدو اصعب بكثير من اللي مريت فيه انا..لكن ، فيه شيء في داخلك متمسك بالأمل ياخالد..لأن محاولات انتحارك كلها كانت ضعيفة..وهذا الشيء جداً رائع..تمسك ب بصيص الأمل يا اخوي مهما كانت الظروف صعبة وتقفلت الأبواب في وجهك من كل جهة..

بأقولك تجربتي مع الأنتحار..كنت ابحث في النت عن اسهل طريقة عشان انهي حياتي واحط حد لمعاناتي مع الأضطرابات النفسية وغيرها من الأمور السيئة اللي حصلت في حياتي..قررت اشتري ٦ مدري ٧ كراتين من بندول نايت..وابتلعت قرابة ال٢٠٠ او ٤٠٠ حبه ناسي والله..اذكر اني بديت ادوخ ورحت صليت شكر لله بأني بأودع الحياه اخيراً..لكن في لحظة غياب العقل قلبي مانسى امي ورحت اودعها ..قبل لا أدخل في غيبوبه لمدة اسبوع..معدتي ماتحملت كمية الأدوية اللي خذتها فرجعت وانت بكرامه واللي يقرأ دم على جسمي كله..

لمن صحيت لقيت نفسي مربط على سرير في المستشفى..واسمع الممرضات يقولون لبعضهم * سايكو سايكو * يقصدون اني مريض نفسي..خليتهم يفكون عني الأربطه ورحت الحمام..وشاهدت وجهي كيف كان اصفر وشاحب و جسمي ووجهي كذلك ملطخ بالدم..كان منظري مخيف جداً..

وش اللي استفدته بالله غير انه تم وصمي ومعاملتي الى الأن بأني مريض نفسي بسبب محاولة الأنتحار ؟ ياخالد انت ماتفكر بالعواقب ومتهور وكلامك فيه تحدي لله انتبه وانا اخوك ! كل شيء الا انك تحط راسك براس الله..ماخذ الشغله عناد وتحدي يعني ؟ راح تسيئ ظروفك اكثر وتتبهذل اكثر انتبه لكلامك وحاول تمسك لسانك وتستغفر..لأن الأسئلة اللي تدور في راسك وكتبتها هنا كنت افكر واسئل نفس أسئلتك " ليه الله خلاني عايش لين الحين ؟ ليه الله يكرهني ؟ وش سويت انا في حياتي عشان يصير لي ذا كله ؟ الخ "

في الأخير مازلت اصارع في الحياه..ومابكذب عليك واقولك ان ظروفي تحسنت بل ساءت اكثر..لكن..تذكر قول الله في كتابه الكريم "بأن الله ليس بظلام للعبيد "