|
ممكن تحاولون معي ولكم الاجر
بسم الله الرحمن الرحيم
السلام عليكم ورحمة الله وبركاته وبعد.............
ما تتخيلون وش كثر يكبر في نفسي الامل وانا اتصفح موقعكم الخيري اسال الله العظيم ان يوفقكم على اداء مهمتكم النبيله ولا يحرمكم الاجر وان يمن على جميع الاعضاء بالصبر والعافيه انه قيوم قادر على كل شيء...........
عندي مشكله وهي الرهاب الاجتماعي .. اعاني منه من ست سنوات تقريبا والى الان مالقيت له حل. انا مؤمن انه مرض يمكن ان يعالج لكن وين الطريق رحت للطبيب النفسي لكن دون جدوى .. مع ان الطبيب قال لي ان المرض عندي متوسط يعني مهوب معقد.. تزوجت قبل اربعة شهور وانا بانتظار مولودي الاول بعد سته شهور ان شاء الله وزوجتي انسانه مرحه للغايه دائما تحب الضحك والتنكيت وان احاول اني اتاثر بطبعها .. عندنا مجتمع محافظ جدا يعني عوائد وتقاليد وخصوصا عند مقابلة الرجال . يعني اذا قابلة احد من الجماعه لازم تكون قوي في السلام وفي الرد وفي الدعوه للمنزل .. انا اخاف من الاشاء هذي كلها واذا حسيت اني مقصر في الكلام مع احد الوم نفسي كثير وتتعقد نفسي كثير حيث اني ودي تكون هذي الجزئيه في حياتي ممتازه .. بدءا الحقد على الناس يملء قلبي مع اني ماني حقود لكن حسرتي على نفسي خلتني كذا .اسرتي معروفه بحب الناس لها عشان ابوي كان مالك قلوب الناس بطيبته كل من قابل ابوي يحبه حتى اعداءه كانو يحبون . اسرتي مفككه جدا بعد موت ابوي .. انا ترتيبي الثاني بين الذكور والخامس في العائله .. امي ماعلمتنا الاهتمام ببعضنا ولاتتهتم فينا .. مصدر الحنان في العائله ابوي ومات .... مجتمعنا بعد موت ابوي يبونا نكون مثله ..اخوي الكبير تركنا بعد موت الوالد وانا استلمت مسؤليه البيت يعني مسؤلية اخواني وخواتي وعددهم سبعه خمسه ذكور وبنتين كلهم اصغر مني .. لكن الرهاب الاجتماعي مو مخليني اقوم بشي. لكن انا اصارعه واحاول اقنع نفسي اني بيجي اليوم اللي بكون بدون الرهاب وبعيش حياتي وانا سعيد .........
معليش طولت السالفه لكني احاول اشرح قصتي حتى اجد الحل بتوفيق الله عندكم ولكم مني التقدير ........
|