نفساني - عرض مشاركة واحدة

17-08-2017, 12:52 AM

تعبت من ممشى على غير مشهاي
وتعبت من صبر على غير غايه
طاحت عزومي لين قلت نواياي
وابعدت من مبداي صوب النهايه
مغير اهوجس واضرب الراي بالراي
واثر المغربل ما يخلصه رايه
الوقت ذا هو هو بطبعه وانياي
انا صدوق وذا زمان الدعايه
يالله ان تعاوني على كبر بلواي
ويالله ان تقديني طريق الهدايه
اشكي من الماضي وخوفي من الجاي
ولي في ملمات اليالي ذرايه
لو كنت اعرف دواي ماخفت من داي
اخير من طب الطبيب الوقايه
سبحان من يعرف مقاسيم دنياي
في صفحتن ماتنعرض للقرايه
اذا غدى وقتي جزوع من حكاي
ادوي بهاجوسي على كل مايه
فالا كسرني هاجسي صوب مركاي
فايه جبرني نخوة دموعي ايه
وان شفت همي مانقص من تشكواي
اخترت من نطح الهموم القفايه
وقت غدا كنه علي اكبر عداي
يفرح علي مجمعين الوشايه
صادفت صكات الزمن فاول صباي
وصادمت قد شيبي بوجه المرايه
لا الين نبات الارض غارس ورواي
وشوك السلم ماخذ على اسمي وصايه
اعد غلطاتي واحسب خطاياي
لا نيب مندل ولا نيب تايه
ايس وتيبس عقب مايس شفاياي
وامل وبعض امال قلبي غوايه
لا اسوم انا وجهي ولا امد يمناي
ثنتين تحسب للمذله لدايه
بلقي هموم الليالي مقفاي
لين اقلب اخر صفحتن للروايه
برضى بمقسومي على طية رشاي
لا عاد لي شف ولالي هوايه
مالي جدى الا ونة القلب ودعاي
وعناية الله ما وراها عنايه
بسكت وسري ساجنه في حناياي
يالين تروي المقبلات الحكايه

منقول