نفساني - عرض مشاركة واحدة

06-04-2018, 04:55 PM

هلا وغلا عيون ..
عندي قناعه ان الانسان انعكاس للاخر يعني مرايه للشخص اللي يتعامل معاه مايهم مين الشخص .. عشان كذا تشوفين كلماتي بعين قلبك و روحك الشفافه راح اعترف لك بشي انا قلقي الاول اسبابه الخوف من المرض سواء لنفسي او لأي قريب او بعيد تجيني حالة حزن و خوف مالها تفسير قالي الدكتور مشكلتك الخوف من الفقد والفقد سببه الرئيسي المرض وهذا حقيقه يعني اسمع من صاحبتي انها تعبانه نفسيا او معها كحه اشعر بقلق وكل شوي اتصل وادور عن اسرع طريقه للعلاج وقيسي هالشي على كل انسان اعرفه بحياتي يمكن الفقد يرعبني لاني فقدت امي وابوي بنفس السنه وبسبب مرض طويل يمكن مدري .
نجي لتعلقك بالبساس رحمتك عليهم سببت لك ازمات نفسيه حتى لو صغيره وبدت تكبر بعلمك طريقه انا تنفع معاي وان شاء الله تنفع معاك قرأت من فتره عباره ان التعلق الزايد بأي شي بالحياه بيكون سبب عذاب للشخص المتعلق سواء تعلق بمال او ولد او زوج او حيوان اي شي على وجه الارض واسترجعت سنين عمري الخمسين ولقيت ان هالشي حقيقه اي شي حبيته من قلبي كان سبب المي الكبير لذلك بعد امي وابوي قررت احب نفسي قبل اي شي والنقطه الاهم اني ما اضر احد ولا اضر اي مخلوق على وجه الارض يمكن عشان كذا خفت اربي اي حيوان عشان ما اتوثم فيه سواء بعلمي او بدون قصد وحقيقة ارتحت لكن تبقى المشكله الاهم اللي هي الخوف من الفقد .. يمكن تشبهيني عيون بالظروف وعدم الزواج وعدم الانجاب احيانا انظر وراء واشوف اني ماحققت شي بالحياه وفطرتي كانثى او انسان لكني مو متأزمه من هالشي لكنه خلق بداخلي فراغ كبير .. انتي طبعا اصغر والعمر لسا فيه وقت للانجاب عشان كذا بنبهك لشي حبيبتي ومن كل قلبي انتبهي لسنوات العمر القادمه اخرجي من داخلك حبي الحياه واقبلي عليها بكل حماس ولاتخافي مو شرط الزواج لكن نفسك لها عليك حق سافري شوفي ثقافات اخرى ومجتمعات اخرى ماقولك خالطي هالمجتمع اللي اغلبه مريض بالهياط والمظاهر لكن اصنعي طريقك الخاص بهوايه او مشروع حتى لو كان مساعدة الاخر الروح المعطاءه اللي زيك تتعب لو سجنت داخل اسوار محدوده .. مهما حكينا حبيبتي محد يشعر باللي نشعر فيه الا احنا بس .ما اكذب عليك اني ما املك هوايه محدده طول عمري لكني اكتشفت من خلال زيارتي للددكتور اهداف ودي اوصل لها منها رعاية المسنين .
من خلال مداخلتك حسيت انك سجنتي نفسك بالام القطط هم ارواح ومن حقهم علينا الرحمه لكن الاولى بالرحمه اننا نرحم انفسنا صرتي تنفرين من الجيران والشارع لكن خليك اقوى من الجيران ومن الشارع واصنعي طريقك اشباهك بالحياه راح يتعب كثير انا اكبر منك سنا وانتي ماشاء الله عليك ماينقصك العقل والتفكر فكري بنفسك اولا وابدأي بأول خطوه لكن تسأليني كيف اقول مدري لاني ماعرف ظروفك ولا بيئتك الاجتماعيه حاولي عيون صدقيني فيه ابواب مفتوحه امامنا لكن حصر ارواحنا بالقوقعه خلتنا مانشوف الابواب الا من زاويتنا الضيقه ..
انتي جميله بكل ماتحمل الكلمه من معني روح شفافه خلق جميل ترتيب افكار قرب من الله هل تتوقعي ربي ماراح يجازيك خير ؟ مستحيل ربي رب الخير والرحمه ابدأي انتي بس بأول خطوه وراح تلاقي الدنيا انفتحت كلها امامك .
دائما اطلبي خير الدنيا والاخره ولا تيأسي من دنياك التي فيها معاشك .
بشريني بأول خطوه و اول شعور لك بالسعاده ارجوك.