نفساني - عرض مشاركة واحدة

07-04-2018, 03:44 AM

صباح الخير
هلا وغلا حبيبتي عيون .. تذكرت قصه لصاحبتي تزوجت قريب لها بعد اعجاب متبادل لسنين ولما تخرج من الجامعه في امريكا رجع وخطبها و تزوجو وكانت بقمة السعاده عةشو ايام جميله انجبت طفلها الاول وكلنا فرحنا فيه مو بس هي كان لعبتنا انا اتنكد لو اروح بيتها ويكون نايم اقعد احارشه لين يصحى .. وصل عمر الولد سنتين كان يمشي طبيعي وفجأه صار يمشي على اطراف اصابعه فجأه صار معد يوقف صار يهتز اذا وقفناه فجأه حسينا رجوله زي الخرقه مافيها عصب ولا عظم انهبلت امه وابوه ومابقى مستشفى الا ودوه ومافيه فايده ومابقى شيخ الا رقاه لكن الولد مثل ماهو سافرو فيه برا السعوديه امريكا ولندن والمانيا وماعرفو للولد ودوه الصين قالو يمكت خلايا جذعيه ومافيه فايده خساير ماديه رهيبه ونفسيه اشد واعظم حملت امه وجابت بنت طبيعيه وحملت بعد البنت في ولد ونفس حكاية الولد الاول وصل سنتين يمشي وبعدين صار به اللي صار باخوه بعد جهد مضني راسلو مايو كلينك بامريكا وطلب يشوف العيال وسافرو لامريكا وبعد فحوصات دامت ٧ شهور اكتشفو ان فيه نوع من الانزيمات والدهون تسبب عدم ترويه للاعصاب بالدم وغيرو لهم اكلهم من والى حتى لما رجعو صارت اكلهم يجي من امريكا كل شهر غذاء طبي معلب .. الان العيال واحد عمره ٢٣ والثاني ١٨ من اجمل الشخصيات اللي ممكن تشوفينها بالحياه رقي وعلم وذكاء وهم على حالهم لكن خوصر المرض بنوع التغذيه .. تشوفين كيف امهم تطالعهم وتطالع عيال الناس كلهم على كراسي متحركه واسأل امهم مبسوطه انك شفتيهم بشنبات قالت ماتتخيلي كيف سعيده فيهم مو لازم يمشون المهم انهم ينجزون لنفسهم وهذا اللي عطاني ربي وكل عطاياه جميله .. الزبده من القصه ان هالأم من اسعد الناس بالحياه كمية تفاؤل وطمأنينه الله لايغير عليها الا باحسن حال .
انا حبيبتي لي الشرف اني اكون اختك ولي الشرف اني قدرت اوصل لروحك بكلماتي وعندي يقين انك بيوم بتقولين لي انا افضل حال وابتديت اشعر بشبابيك فرح تنفتح لي وحياتي الجديده السعيده ابتدت .
انتي ماتطلبي من بشر انتي تطلبي من اعظم العظماء واغنى الاغنياء واقوى الاقوياء ملك الملوك ذا الجلال والاكرام ارحم الرحمين اذا اراد شيئا قال كن فيكون .
كل ليله نامي وقولي بكره اجمل واسعد ومن بكره بيبتدي البعيد يقرب والعسير يتيسر بحول الله وشوفي التغيير العجيب .
بقولك شي بس لاتزعلي مني عيون انتي برمجتي نفسك على الحزن بدون ماتشعري على الخوف والقلق لا حبيبتي لايومك بيجي قبل يومك ولا رزقك بياخذه غيرك زلاخوف بيدفع الشر ولا حزنك وضيقتك بتغير الواقع ارجع اقولك سوي الحوار الداخلي بينك وبين نفسك . ما اشتقتي للبهجه ؟ ما اشتقتي للفرح ؟ ما اشتقتي للعافيه وراحة البال ؟ اشتقتي لهذا كله لكنك يأستي لان الوضع طال اقلبي صفحة امس وقولي امس لأمس وبكره لرب بكره وانا الان وهنا وفي اللحظه ابغى اعيش .
بشريني بشمعة امل تنولد اعمق اعماق روحك شوفيها اشعري فيها اكديها لنفسك وكل شيء على الله يسير .
وانا اختك بهالدنيا اي سؤال واي وقت تحبي تفضفضي ودك تهاوشين احد ودي تفرغين انا موجوده واتابعك .. الله معاك