المشاركة الأصلية كتبت بواسطة قطرات الندا

هلا وغلا لوليتا
كلنا ماجانا نوم وماغير نهوجس وندور على اقسام المنتدى
اسلم طريقه جربتها بالارق اني ما اجبر النوم واقعد انقلب لان هالحاله تطيره زود وتجيب قلق .
ان ماجاك نوم غيري وضعك تصفحي بالنت شوفي فيلم اقرأي سوي اي شي بس لاتحاوولين تنامين .
العقل الباطن شي حساس جدا وماتدخل له الاوامر بالاجبار

المشاركة الأصلية كتبت بواسطة محمد البدراني

هلا لولو هلا قطرات

عجزت لا اناااام ما بقى شي الا وسويته

قمت قبل شوي ونقعت مرة وسويتها غرغرة للحلق

سمعت ان الجوافة حلوة للكحة

المشاركة الأصلية كتبت بواسطة عيون متفائلة

السلام عليكم أخواني أخواتي الكرام و الكريمات

يارب يسعد لي صباحكم و كل أوقاتكم


سلامتكم يا اخواني الغاليين محمد و قطرات و لوليتا و الجميع


اخوي محمد ورق الجوافة ممتاز للكحة و لكل داء و فالك العافية يارب

سبحان الله تقريبا نفس اللي مريت فيه أخوي محمد مر فيه أخوي والتشخيص فصام مع أنه ماشاء الله شرواك أطيب ما رأت عيني و أنقى سريرة و كل طبع جميل فيه ، لدرجة أنا أتعلم منه مع إني شبه إني ربيته ، لأن أمي طولت ما أنجبت بعدي و انجبته يوم صار عمري ثمان سنين و كنت أحس إنه ولدي مو اخوي ، حتى و هو صغير كان يناديني أما بتشديد الميم زي لهجة المصارية و ينادي أمي ماما

مع إني ما طلبت منه يناديني كذا ، هو نطقها أول ما نطق كلمة ماما

كنت مسؤولة عنه من الرضاعة لين تبديل الملابس و الأكل ، يتبعني في كل مكان أكثر من امي ، يوم يمرض كنت أقلق عليه و أروح معاه المستشفى مع الوالد و اشيله و كان وقتها مفروض علي إني اغطي وجهي من الصف الخامس و يوم ادخل صالة الإنتظار الخاصة بالنساء ياشرون علي الحريم يقولون شوفوا أم صغيرة و يسألوني بتعجب ولدك ؟ أقول اخوي لأن شنطة اغراضه و الرضاعة معي و اناوله اياها
حتى يوم كان يمرض و هو نونو و يستفرغ علي ما كنت أزعل بينما كنت استغرب أن أمي تتضايق و تعصب و تهاوش

يمكن اللي قربنا من بعض أننا حساسين و نكره الصوت العالي و الصراخ

أحيان أشك أن بيننا و بين الوالدة بلاء ، حواجز شاهقة و أسوار و بروج

و اللي يخليني ما أزعل منها أنها انجبته ، يمكن لو أنا انجبته ما كان بهذي الطباع ، أنجبت اللي خلاني اعرف أن فيه بياض في البشر و أن فيه لون ابيض غير السواد و المرض اللي ملى قلوب البشر

اثنين في حياتي يوم تسود الدنيا في وجهي و أكره اهلها و يوم يطرون علي أحس أنها بخير جدتي الله يرحمها و اخوي الله يحفظه

مرة حبيبي ضعيف متعلق فيني لدرجة ما أبين له إني مريضة حتى ما يقلق و يشيل همي فوق مرضه يارب يعافيه

سبحان الله ربي ابتلاه و ابتلاني في أعز ما عندي

كسرتني الدنيا فيه و قهرتني عليه بمرضه و وقف حاله

كانوا الشغالات يوم يشوفون تعامله معي و تعاملي معاه يقولون هذا ولدك مستحيل يكون اخوك لأني كمان اخاف عليه خوف فظيع حتى يوم يزيد عليه الوسواس يطلب إني ارقيه ، يقولون بالله اعترفي لدرجة يوم يطلب مني أي أحد كنية اتكنى باسمه أم فلان ، حتى ملامحنا كربون من بعض

دايم يعذبني التفكير في المستقبل اخاف لا قدر الله ما يتزوج و أنا ودي له بضنا يشيلونه و هذي حالته ، و ما أحد يبي يعطف عليه غير عياله

لذلك دايم اخوي محمد أدعي لك مثل ما أدعو له و يهمني امركم و شفاؤكم و التقدم في حياتكم

و ما على الله بعيد

أسأل الله الكريم رب العرش العظيم الشفاء العاجل لكما و لجميع المسلمين