نفساني - عرض مشاركة واحدة

26-04-2018, 03:46 AM

السلام عليكم
هلا بكم أخواني أخواتي

أرحب اخوي محمد عسى ربي يبارك لك في رزقك و يحفظ لك صحتك

هلا بكن خواتي العزيزات قطرات و لوليتا و الجميع

قطرات يسعدني إحساسك بي و رغبتك في مساعدتي ربي يرفع قدرك و يكتب أجرك صرت ما استغني عنك ربي يحفظك

بالنسبة لأخوي الله يشفيه عنده مرضين متداخلين مع بعض الفصام و اضطراب وجداني ثنائي القطب و على طول و باستمرار تحصل له انتكاسات متلاحقة و ميول انتحارية لدرجة ينومونه كل فترة

حالته صعبة و معقدة و الظاهر أيضا أنه يعاني مثل ما يعاني اخوي محمد من السحر الله يعافيهم جميعا

أسأل الله أن ينتقم و يحاسب كل مؤذ و مؤذية

و هذا اللي خلى الوالدة من صغرنا مخنوقة و متضايقة منا و تدعي علينا

لدرجة يوم كنا نمرض و حنا صغار نتمنى ما نمرض مدري ليش كان يزيد زعلها منا و تنكيلها فينا

و الوالد الله يرحمه ما ودي اتكلم عنه لأن ما يجوز على الميت إلا الرحمة

عشان كذا القسوة اللي الواحد شافها دمرت اوادم و مستقبلهم

حتى جدتي أم الوالدة كانت تستغرب من التصرفات ذي و تقول سامحيهم مو بحيلهم غصب عنهم بعدين يوم كبرت فهمت أنه قد يكون سحر إلا أكيد

كنت استغرب من اهتمام خالاتي بعيالهم اللي بعمرنا و حرصهن على اختباراتهم و حياتهم و فرحهم بنجاحهم و اقامة الحفلات و حنا و اخواني زي الأيتام ، ما نسمع غير الصريخ و التهديد و الاحتقار

عشان كذا التفينا حول بعض و حسوا إني أمهم حتى جدتي الله يرحمها هي اللي علمتني كيف أحضر رضعاتهم و أغير ملابسهم و الطبخ و غسل الملابس و كيها ، حتى إعداد الشاي و القهوة الوالد الله يرحمه من الصف الرابع الابتدائي

يمكن لو ما كانت جدتي موجودة في الحياة تمرضنا و تهتم فينا مدري وش صار فينا

لو ما شفت الحنان من جدتي الله يرحمها ما كنت أظن أن فيه شيء اسمه حنان في الدنيا