نفساني - عرض مشاركة واحدة

14-05-2018, 01:54 AM

أخوي محمد لا تعتذر يسلم راسك يارب ، ما فيها شي كانك تغليهم ما ألومك فيهم صراحة ماشاء الله عليهم عبارة عن ذوق يمشي على الأرض ربي يحفظهم و يديم أخوتكم طول العمر و يطمنا عليهم

قطرات الغالية إيه ما يبيعون غير بوصفة ، كنت أجيب مضادات حيوية بشرية تخص الأطفال للضعوف حقيني لكن خلاص كل شي بوصفة ، مع إن تعاملاتي كلها مع البياطرة اللي يجون البيت و اللي ما يكتبون روشتة لأنهم غير رسميين ، لكن قالوا لي إن صيدلية المجتمع ممكن يبيعون بدون وصفة ، ابشوفها بكرة ان شاء الله ، فيه وحدة بشارع عابر القارات اللي ورانا ، ابمرها قبل أمر بندة
اللي جنبها

و أبشرك جات الليلة البيطرية التونسية الحمدلله و نسيت أعرض عليها واحد من ضمن الوجعانين اسمه مالك مع اني حاشرته في صندوق التنقل قبل تجي
و عاد هذا حالته ما تنتظر لأنه بالفترة الأخيرة صاير يطب صندوق الرمل و انت بكرامة في اليوم فوق عشر مرات ضعيف بدون يقضي حاجته ، خايفة لا قدر الله يكون عنده مشكلة بالكلى و يحتاج قسطرة بولية ، لأن ذي المشكلة تصيب ذكور القطط اكثر من اناثها

شافت كم حالة من ضمنهم الرضع الصغار و ضغطت على بطونهم قالت عندهم تضخم في الكلى حبايبي و اعطتني بعض الادوية المدرة للبول و اللي تنشط كلاهم
و ذاك استغربت انه الى الآن ما يمشي من مدة خمسة ايام ، تقول هل سقط من ارتفاع قلت لا
قالت أجل بسبب تضخم الكلى
توهم شهر و أيام ما شافوا شي من الدنيا

تدرين قطرات وش المشكلة اللي ما تخليني ابرد قلبي و ارتاح من جهتهم ، اني لو تغافلت عن الحالة و أجلت علاجها يوم يومين تتدهور حالتهم في ظرف ايام لدرجة الوفاة في أحيان كثيرة و حصلت قبل كذا

يا اختي سبحان الله ما هم زي البشر شوي الواحد يقدر يتلاحقهم ، هؤلاء الضعوف لو تلتهب عيون الواحد تلقينه امتنع تماما عن الاكل و الماء لين يصيبه الجفاف في يومين ثلاث ايام و تتدهور حالته

تدرين عندي فوق خمسة كل واحد فيهم بعين وحدة ، لان يوم التهبت عيونهم ما كنت انتظم في إعطاء القطرات اللي لابد تعطى ثلاث مرات باليوم بسبب ذيك الفترة الله لا يعيدها فترة السبات الشتوي أيام أخذ العلاج النفسي يوم كنت ارقد عشرين ساعة يوميا

لذلك انا مترددة في اخذ العلاج النفسي من جديد ، و انا وراي اهلي و بسوسي ربي يحفظهم جميع

اما بالنسبة لنفسي تقريبا نسيت اني انثى غير يوم اضطر أكد شعري اللي نفسي دايم تراودني في قصه لاني فوق خمسة سنين ما شغلت فيه المقص

الله يعيننا جميعا بالعفو و العافية