نفساني - عرض مشاركة واحدة

15-05-2018, 12:34 PM

لا اخوي بالعكس مافيه اطاله ولا ازعاج احنا هنا نخفف عن بعض لعل اجابه من احدنا تريح القلب وتطمن .
انا جاني الضغط عام ٢٠١٣ والهلع من سبعه شهور تقريبا .
لا ما امارس حياتي زي اول ابدا معد اطلع كثير الا للضروره ولا اسافر فيني رعب من الطياره وما ارتاح الا في بيتي .
انا مو متزوجه ووالديني متوفين وخواتي بالرياض مو بالشرقيه .
اعراضي تزيد وتنقص بلا مقدمات يعني فجأه احس بضغط وشد بالراس ولفه غريبه كأنه بيغمى علي يزيد النبض عندي وعدم توازن .
بالاوقات العاديه اللي اكون مرتاحه غالبا بالبيت وبالهدوء اكره الاصوات واتعب عند اي مجهود مو تعب بمعنى تعب بس احس اني مو انا .
عملت تحاليل سليمه الحمدلله
انا خلصت جامعه من زمان ولا اشتغل قاعده بالبيت .
كنت اجتماعيه جدا والان انعزلت واكره الزحمه والجمعات .
اعراضي المستمره عدم التوازن اغلب الاحيان والمزاج المحبط لأن هالاعراض منكده علي .
لاحظت اني صايره عصبيه .
الم باسفل راسي واكتافي وكأن فيه حصاة كبيره خلف راسي .
تغبيش بالنظر .
الاحظ لما اكل معجنات تزيد الدوخه شوي والنكد .
احيانا كتمه واقعد اتثاوب لين مايرجع النفس .
احيانا تجيني رعشه وكأن رجولي ماتشيلني .
عسى مانسيت شي
ايه الاعراض كل ماجت نوبه تجي باعراض جديده ومختلفه واقعد اقول لا هذي مو زي كل مره وهالشي يقلقني .
الحاله اللي تخفف عني بصراحه مدري بس اني اقعد اسمي واحط يدي على صدري واسمي واقرا اي ايه من القران وانفخ بصدري واحيانا اكلم نفسي بداخلي واقول اهدي هذي نوبه ومافيه شي خطير واحيانا استرخي واتنفس بهدوء يعني كل مره تختلف .
الدكتور سمى لي هالحاله طبيا يقول انت تخافين من الفناء اللي هو الموت او الغيبوبه ولها مصطلح طبي . هذا مختلف عن الهلع وصحيح انا كل شي يحسسني بالمجهول او الغياب عن الوعي يرعبني حتى الدواء اللي احس انه ممكن يسبب لي اعراض جانبيه ما اكله .
اتمنى قدرت افيدك بشي او اوصل لك معلومه مع العذر لو نسيت شي