نفساني - عرض مشاركة واحدة

20-05-2018, 08:44 AM

هلا محمد تسلم الله يسعدك ويحفظك .
ترى كنت زمان مثلك من يجي رمضان تجيني تكه ورعب وقلق و توتر استغفر الله ابد ما انبسط بدخول الشهر ومتى تشتد النوبه ؟ عقب السحور وهجدة الناس وتشتد اكثر بعد صلاة الفجر مشاعر غريبه ورعشه وارق واعراض كثيره .
بعد العلاج السلوكي علمت الدكتور عن هالشي قال لأنه مرتبط بوقت وفاة صديقتك كان اول يوم رمضان الساعه ٦ الصبح تدري وش قالي ؟ قال استقبلي كل هالمشاعر السلبيه بكل هدوء وحاوريها داخل نفسك قولي طيب وبعدين اكثر شي بيصير وشو ؟ موت ؟ طيب وبعدين ؟ قال اذا تعمقتي بالفكره تصير تافهه بس خليك هاديه ومسترخيه جدا ونظمي التنفس بهدوء فيالبدايه شوي صعب بس بعدين عادي وبالفعل والله يامحمد اكتشفت ان نوبات الاكتئاب او الهلع تكبر لأننا في عز النوبه و قوتها نهرب بافكارنا منها ونهرب ونهرب وهي تلحقنا وتكبر وتكبر لين ماتصير مرعبه وكارثه بس لما واجهت مره ومرتين وثلاث بالفعل بدت تصير تافهه ولا تخوفني .
انا امس رحت لاستشاري باطني وكسرت حاجز الخوف من الابر وعملت تحاليل كامله قلت عشان لو جتني دوخه او هلع ماقول انا فيني وفيني لا كل شي سليم معناها اهجدي يامره ولا تلعبين بنفسك وافكارك وبصراحه كنت سعيده بانجازي امس بالذات ان التحاليل سليمه لله الفضل والمنه .
اختي عيون هلا وغلا تسلمين حبيبتي الله يسعدك ويسخر لك الخيره بحياتك ..
انا مؤمنه بالطب النفسي والطب بشكل عام لكن يعتمد على توفيق الله وضمير الدكتور وشطارته ومؤمنه بالطب اكثر من الاعشاب لاتزعلين مني بس هذي قناعتي قولي ليش ؟
ايام الرسول عليه الصلاة والسلام ماعندهم امراض زي وقتنا هذا سواء دوده زايده او عمليات قلب مفتوح او او الخ
ربي ماسخر لنا الطب الا لمنفعة البشريه ياما مرضى بين الحياة والموت بفضل الله بعملية قلب رجعو لحياتهم وياما مريض نفسي رجع لحياته وياما مدمن تعافى بس مشكلتنا كبشر تلفت نظرنا التجارب السلبيه وتاخذ انتشار اكبر من التجارب الايجابيه .
اكيد فيه اعشاب تنفع لكن الى الان ماشفت حاله تعافت من عشبه .
امس الاستشاري الباطني يقولي ليش ماتاخذين البرنتلكس امن ودواء جميل وتقدرين تتركينه بأي وقت ليش تضيعين ايامك بالخوف والضيق ؟ قالي على قصه حصلت لولد اخوه بمصر كان معاه اضطراب وجداني واكتئاب حاد من الصغر يقول امه من الصعيد ورافضه شي اسمه طبيب نفسي وصل الولد لعمر ٢٧ مامعاه الا شهادة ابتدائي لاشغل لا انجاز لا مشاركه بس في غرفته ياكل وينام ويعطونه من هالاعشاب وكل ماداهمته نوبه قويه ودوه طوارئ عطوه مهدئات يقول اهديته من سنتين لابتوب وبعد سبعه شهور قالي ياعمي عاوز اروح لدكتور نفسي يقول اخذته لمركز احمد عكاشه وامه زعلت تقول ابني مش مقنون يقول شخص حالته واعطاه الادويه يقول بعد شهر بالضبط شفت ابن اخويا واحد ثاني اول شي صار يصلي بالمسجد ونزل يدور على شغل ولقى شغل بمشروع بعيد عن القاهره واول مره بحياته يسكن بعيد عن اهله ٧٠ كيلو يقول وتبرعنا له كل العيله وعمل كشك يعمل فيه كشري وعصير ليمون بالنعناع في المدينه الجديده واقبلو الناس عليه وبعد كم شهر عمل محل صغير وفرع ثاني بالقاهره ... الى اخر القصه ادري طولت عليكم بس انا دائما متفائله لأن مقسم الحياه والارزاق والصحه وتدبير الامر كله بيد الله لكن ربي يبغانا نسعى بعد مانتوكل عليه .
لاتيأسو ابدا الله موجود ويشوفك ويعرف حالتك ويعرف الحمل اللي بقلبك وعلى كتفك اهرب اليه والجأ اليه .
الهروب الى الله اعظم انواع الهروب لكننا للاسف نهرب للخلق والشيطان واليأس ويزيدنا ابليس خساره .
عيون اسعي وانفضي غبار الألم والذكريات المؤلمه لأنك ماراح تقدري تغيري فيها قيد انمله .
قولي ربي خلقني لكي اعيش واعبده واكون سعيده بهالحياه .. القرب من الله ليس صلاة وصيام بس الهروب محبه ورجاء وأمل وحسن ظن وش فايدة تحفظين القران كامل وانتي الخوف مالي قلبك والضيق ؟ الاسلام اسلوب حياه وخارطة طريق مو بس فروض اعملها ..
عيون حبي نفسك لان لها حق عليك سامحي الماضي بكل الامه .
انظري لقدام بعين امل حتى لو كنتي مقفل عليك من كل جهه لاتعلمين اي باب راح يفتحه الله .
كلامي مو فلسفه بس انا استشعر الله بكل خلايا روحي وقلبي لان وحده القادر على كل شي .
اتمنى لكم السعاده من كل قلبي