المشاركة الأصلية كتبت بواسطة قطرات الندا

حمدلله ع سلامتك وشم ومن احسن لاحسن حال يارب .
صبري ليه ماتغير دكتورك وانا اختك ؟ انت مو طالب الشفاء التام طالب ترتاح بس وهالشي اشوفه عند اغلب اللي فيهم اكتئاب انه يقدر يمارس حياته .. انا دكتوري النفسي يقولي اذا ما ارتحتي معاي غيري لدكتور ثاني يمكن الدكتور الثاني يكتشف شي انا مو شايفه او يشخص تشخيص مختلف او له مدرسه بالعلاج غير عن مدرستي يقصد الطريقه وهذا الصح .. لاتيأس صدقني علاجك موجود لكن لسا ماعرفته انت اسعى وابحث وغير طبيب وثاني وثالث .. غير المنطقه بكبرها والله اني اقرأ لحالات اكتئاب انتحرو اكثر من ثلاث مرات ومانجحو وبعدها تشافو .. تعرفت على بنت بالعياده عمرها 28 تعاني من عمر 17 سنه وقعدت الى عمر 25 اهلها مايدرون ماغير تروح من دكتور لدكتور وجربت اغلب الادويه تحلف تقول اني احيانا اصحى من النوم ما اعرف مين انا ولا وين انا فيه وسببت لها الادويه نزيف بالدوره الشهريه الله يكرمكم وتبهدلت حتى وانا اناظر فيها احس انها ذابله عيونها وجلستها وربي اني نسيت همي وهي تحكي طلعت من الجامعه وحالتها تزداد سوء شافها خالها وركز عليها وكلم امها قالت مدري شفيها دايم تبكي وماتطلع من غرفتها قال خالها لازم نوديها لطبيب نفسي ورفض ابوها قال بنتي مو مجنونه وبعد محاولات وافق الاب وودوها لدكتور لعب فيها بخلطة ادويه صارت بس نايمه وان صحت تايهه ومرت السنين لين جت عند دكتوري تقول عرفت الحياه وتمسكت فيها بعد ماجيت لهالدكتور سحب كل الادويه ومشاها على دواء واحد فقط وقالت اسمه بس ماراح اكتبه يمكن ماينفعك .
تقول مارجعت مثل اول يمكن التحسن 50 بالميه والحزن عدم الدافعيه لسا بس تقول صرت اكل صرت انام واصحى طبيعي صرت اطلع مع اهلي للبقاله صرت اشوف تلفزيون تمسكت بحياتي اكثر صار عندي امل في بكره صرت العب مع عيال خواتي .. عاد عندها مراجعه معاه وكانت قاعده برا وامها وابوها عند الدكتور داخل سألتها اذا الدكتور قالها بتحسنين اكثر قالت ايه قال لسا التحسن مستمر .
عشان كذا اقولك لاتيأس ياصبري غير دكتورك غير حياتك غير ادويتك اسعى والله ان قلبي يتقطع لما اقرالك ألم ويأس وسواد رهيب .. تحرك لعل الله يحدث بعد ذلك امرا .
الله لايطول بك شده يارب