نفساني - عرض مشاركة واحدة

20-06-2018, 06:01 AM

السلام عليكم و رحمة الله و بركاته

أسعد الله جميع أوقاتكم بكل خير

الحمدلله من فضل الله صليت العشاء أمس و نمت مباشرة ما أشوف دربي لأن تقريبا يومين ما نمت غير التوتر و القلق بسبب العوامل الخارجية

و صحيت الساعة ثلاثة قبل الفجر و قمت مرتاحة لو مو اللمبة اللي تشغلها الوالدة الله يحفظها

لأن من يوم تعبت الوالدة و صار ينخفض سكرها و تدوخ في السنتين الأخيرة صرت أنام جنبها ، و هي ماشاء الله عليها تحب تنام بالضوء و انا ما اقدر انام لو الضوء المنبعث من المكيف ظاهر لدرجة اغطيه

و حتى يوم جبت الطوق اللي يوضع على العينين عند النوم لحجب الاضاءة ما ارتحت انام بوه

فيه شغلة ذكرتوها عن الأحلام لفتت نظري

ما قط حلمتوا إن شفتوا ناس و عشتوا تفاصيل اللقاء و يوم قمتوا من النوم تحسون إنهم فعلا كانوا معاكم لدرجة ما زلتوا محتفظين بتفاصيل ملامحهم و رائحتهم ،

مثل بالضبط يوم يجونكم ضيوف محبوبين و يمشون
لدرجة بعد رحيلهم ما ودكم تغادرون المجلس و تظلون تتاملون اماكن جلوسهم اللي خلت منهم و فناجيلهم الفارغة و الابتسامة ما زالت ظلالها على محياكم و تتمنون لو ظلوا وقت أطول
تحسون بعد ما يروحون إن الانشراح اللي كان بوجودهم ما زال موجود و تستحضرون الحوار اللي دار و تستعرضون التفاصيل في مخيلتكم باقي اليوم

هذا يحصل كثير في المنام ، كأنه لقاء حقيقي ، و خاصة يوم أشوف جدتي الله يرحمها بالمنام ، أظل مبسوطة باقي اليوم و رائحتها العطرة ما تزال في أنفي و ملامحها البريئة و ابتسامتها الحنونة قدامي و كأني بالفعل قابلتها و شفتها

هل لأن الارواح فعلا تلتقي بالمنام ؟

وش رايكم انتم في ذا الموضوع

شاطئ الراحة معجب بهذا