المشاركة الأصلية كتبت بواسطة الحالم بغد افضل

دا الجدول اللي انا مشيت عليه خلال الاسبوع دا بعد ترك الدواء النفسي " سبرالكس "

1- حباية مالتي فيتامين فيتا مكس بلس يوم بعد يوم
2 - حباية فيتامين ب مركب يوم بعد يوم
3 - اوكستروبيل 600 مجم تلات مرات يوميا
4 - كولوفيرين A حباية قبل الاكل تلات مرات يوميا
5 - 5-Htp حباية 100 مجم بعد الفطار يوميا

حالتي النفسية جيدة مفيش انتكاسة زي اللي كانت بتحصلي كل مره لما اترك الدواء , اعراض انسحاب الدوا الوحيدة اللي حاسس بيها هي كهربا خفيفة عند الحركة المفاجأة
تركيزي زاد وحتي الرؤية عندي بقت اوضح , مبقتش عايز انام طول النهار زي ما كنت باخد الدوا , كنت بضطر اشرب قهوة اكتر من مره في اليوم علشان اظبط دماغي وافوق وبرضوا كنت ببقي مش مركز ,
دلوقت بصحي فايق ومش بحتاج اشرب قهوة رغم اني بشربها دلوقت تعود ومن بكره حقطعها لاني حاسس انها ملهاش لازمه خلاص ولو بطلتها حيبقي افضل .
انا بتمرن كل يوم كمال اجسام وبجري علي مشاية , دلوقت المجهود اللي ببزله في التمرين بقي الضعف وحاسس اني اعصابي جامدة , الاول كنت ببقي مش قادر ارفع الاوزان ومفيش اتزان في اللعب
كنت بعض علي سناني بسبب الدوا ودلوقت العض خف عن الاول وكنت بريل وانا نايم برضوا دلوقت قل ,دماغي اصفي من الاول , وقت الدوا كنت دايما حاسس بشد في الجزء الامامي من دماغي واغلب الوقت كنت ببقي قافل حواجي ومكشر , كان عندي تبلد ولامبالاة وقت الدوا , الوضع دلوقت اخف
نقدر نختصر ونقول ان كل الاعراض الجانبية للدوا بتخف مع الوقت وسلبيات ترك الدوا اقل والفضل للمكملات والادوية اللي باخدها
طيب هل في اعراض جانبية للادوية والمكملات ؟ مفيش اي حاجة ظهرت سلبية جديدة من استخدامي ليها بالعكس حاسس بفايدة وان كانت مش ممتازه ولكنها معقولة ومرضية بالنسبة ليه
هدفي من التجربة هو النجاح في الخروج من دائرة مرض الاكتئاب والهلع عن طريق علاج عضوي للمخ بدون اثار جانبية او ادمان وتعود واعراض انسحاب
كل اسبوع حكتب موضوع كدا اقول فيه التطور في الحالة