نفساني - عرض مشاركة واحدة

15-07-2018, 08:54 PM

السلام عليكم و رحمة الله و بركاته

أختي أمل لا تزعلين من أمك ، تراها متضايقة و مقهورة مو منك و لا من بنتك ، هي مقهورة على اللي حصل لك ، تلقينها ما تنام الليل من الهم ،

لأن كل أم تتمنى يكونون عيالها موفقين في بيوتهم و في أسعد حال ، و ينكسرن حبايبي من اللي يجرى لاولادهم و يطلع في صورة غضب ، و احنا نفكر إنهم متضايقين منا

خاصة طلاق البنات عندهم الموت الأحمر

نفس اللي حصل يوم طلبت الانفصال ، و قشيت عفشي صبيحة الجمعة بعد صلاة الاستخارة ، . تفاجأوا فيني و بقراري

و من شدة التضييق من الجميع سامحهم الله ، هربت لبيت جدتي لأمي رحمها الله ، أحن وحدة علي بالكون ، و وقفت في وجيههم و قالت تراها بنتي مثل ماهي بنتكم و اللي ما فيه خير فراقه خير و إذا يبي ينقفل باب يبي ينفتح ألف باب ، و هي الوحيدة اللي تفهمتني و ايدتني في قرار الانفصال و جلست معها اخدمها برموش عيوني حتى توفت رحمها الله بعدها بمدة قصيرة

إلى الآن قلبي يوجعني على فراقها ، تخيلي من فرط حنانها كانت تقبل يديني باستمرار ، مافي أحد حن علي كثرها غير أخوي مريض الفصام ربي يعافيه ، بس ذاك ما اقدر أثقل حبيبي عليه ، لو درا إني مريضة ينفجع علي و ممكن ما ينام الليل ، لذلك ما أقدر افضفض له الله يعافيه و يعافي كل مريض

هو كمان فصامه من النوع الشديد اللي انتكاساته شديدة مع ميول انتحارية و تنويم و جلسات كهرباء

يارب الطف بعبادك ما لنا غيرك يا الله

و ما يهمك قلبي ترى في اهالي يعاملون بناتهم كأنهم جربانات فقط في بداية الطلاق لأنهم يكونون مصدومين لين يتأقلمون ، و الا هم تراهم موجوعين اكثر منا بس ما يبينون

تدرين وحدة من زميلاتي هم ثلاث اخوات تطلقوا خلال سنتين و جابوا عيالهم و ابوهم ضعيف ربي يعافيه جاته جلطة من الهم

ترى الطلاق الوالدين يشوفونه مصيبة و حنا نشوفه زوال هم و بداية حياة جديدة