نفساني - عرض مشاركة واحدة

21-07-2018, 03:35 AM

هلا عفريتة و هلا بياسمين و الجميع

تدرين وش المشكلة يا عفريته ان هو برغم ضعفه الذهني متفهم و هي لا ، مثلا يوم يلقط المفتاح من ورانا و يتأخر بالساعات هو يدري إنه غلطان و يوم أقعد على أعصابي من الخوف عليه و انتظره متى يجي و أبدأ اتكلم و اتفاهم معاه القاها وقفت بيني و بينه و تعصب علي و تهاوش و تقول قدامه ترى ما لك دخل هو ولدي مو ولدك هو وقتها يقول لها أنا غلطان ، يعني معترف بغلطه و يجي يقبل راسي و هي تنقهر زيادة مني و تقلب علي وقتها في قادم الأيام وش يفكني منها شفت كيف ؟

هو مشكلته يدري إنه على غلط و لكنه مندفع ، تعطينه محاضرة عن اضرار التدخين و يدري إنه غلط لكن من يوم يمد له طفل ابو اربع سنين علبة لو فيها سم يقول له اتحداك تجربه على طول اخذه و بلعه بسبب مغامرته و اندفاعه ،

يخوف مندفع و مغامر لأبعد الحدود ، من النوع اللي يدري إن هذا التصرف غلط لكن بسبب ضعفه الذهني الله يعافيه ما يتحكم في قراره يسرع و يطفي النور و يجيب أم المصايب لنفسه و لنا

مرة تأخر فوق الاربع و عشرين ساعة خارج البيت اثره ضيع البيت و انا على اعصابي ماني قادرة احط بحلقي نقطة موية او أغمض و انا مدري وش مصيره و هي سبحان الله عادي جدا ، ودي أبرد قلبي و أخلي الدنيا تقلب تضرب و أريح راسي و بكيفهم لكن بعد وفاة الوالد الله يرحمه بالذات ماني قادرة ، قلبي و ضميري ما يطاوعني ، ما يعرف يدبر نفسه ، ما يفرق بين الصالح و المؤذي ، يثق بكل الناس ،

لو سبحان الله لقي اهل غير الاهل يمكن نفع نفسه و سلك في الحياة ، لكن لقي ناس تبني و ناس تهد و احتار ضعيف ، ترى المشكلة مو في ضعفه الذهني كثير زيه ، لكن التناقض اللي شايفه دهوره خلاه ما يميز بين اللي ينفعه و اللي يضره و الجملة هذي قالها الوالد من زمان الله يرحمه ، قال التناقض في التربية هو سبب خراب الابناء و دمارهم .

و عشان اطمنك اكثر انا و لله الحمد قارئة جيدة في طرق التربية و اتواصل مع مستشاريين تربويين لكن الواقع هو اللي ما يساعد و الله المستعان