نفساني - عرض مشاركة واحدة

02-08-2018, 08:14 PM

السلام عليكم ورحمة الله وبركاته

أخباركم مع الوسواس ؟

احس مادري ليش كتبت هالموضوع بس كل اللي اعرفه ان انتو الوحيدين اللي اقدر اكتب لهم عن اللي احس فيه ويفهموني
لان محد يحس بلي مرييتي فيه الا اذا كان الشخص مر بنفس الوضع :(

مادري من وين ابدأ ؟ من حالتي اللي ماتغيرت من ٤ سنوات ولا من اللي اعانييه

ندمانه قد شعر راسي اني استجبت للهلع و المخاوف هذه و قدرت تسيطر علي و تخليني اترك دراستي اللي كانت شاغله بالي عن وايد امور
كنت اقول فتره وتعدي لكن للاسف الفتره هذه كل مالها تزييد وتزيييد

بالاول كنت بس اعاني من الهلع ووسواس الخوف من الموت ويمكن لان شخصيتي موسوسه ف الوسواس ماقصر معاي خلاني اعاني من كل نوع
وسنه ورا سنه وحالتي تتدهور وللاسف ماقدر اسويلها شيء وكأن الوضع عاجبني

صديقاتي تخرجوا و توظفوا وانا على حالي اقاوم والهلع و مافي اي شي يديد
احياناً من كثر القهر اللي فيني اخاف احسد حد وانا ماودي .. اخاف قلبي يمتلي من الحقد و الحسد ان ليش الناس وضعهم يتغير وانا لا

وادري ان كل هذا خيره .. و ارزاقنا بيد الله وكل شي مكتوب لكن النفس ضعيفه

قبل اشهر تقريباً كان نظام نومي ابداً مش اوكي كنت انام الظهر واقعد المغرب تفوتني صلوات و يومي كله كئيب
ف لازم يعتدل والحمدلله اعتدل .. وكنت انام الليل واقوم الفجر مثلي مثل غيري

لكن بعد رمضان لان في رمضان متعودين على السهر رجع النظام مثل ماهوو

أنا تعبت والله .. تعبت من الهلع تعبت من روتيني تعبت لاني فاضيه ٢٤ ساعه لا عندي شي اسويه
لا دراسه ولا شغل ولا شيء قاعده واستجيب للوسواس اللي عندي .. انا ما اعاني من وسواس واحد والله مليون وسواس وقت واحد

تعبت ان مافي شي يتغير .. مع انه ادري التغير يبدأ من الشخص نفسه .. لكن احس كل الابواب مقفوله في وجهي
ما اقدر ادرس في اي جامعه حكوميه لاني انفصلت ... واذا ابا ادرس لازم جامعه خاصه و ماعندي الميزانيه هذه

صايره اتنرفز من كل شيء والله حتى لو في نظر البعض "تافه"

و هالفتره بالذات وايد اشياء قاعده تصير لي .. مثل اشياء املكها قاعده تخترب مثل هاتفي ولا لابتوبي
واربط هالاشياء بالموت والوسواس !

يعني مثال قبل لا انام .. احس اني اكون انسانه ثانيه التفكير محاصرني من كل اتجاه
حتى لو غمضت عيني في الحلم نفس الشيء احلام طويله عريضه مش مفهومه .. اقوم من النوم متضايقه منها

صايره ما اتحمل اي شي يصير فيني .. يعني اي مرض حتى لو زكام ماقدر اتحمل شيء خلاص

تعبت من كل شيء والله ولا ادري شو اسوي كيف اتصرف !

المصدر: نفساني