نفساني - عرض مشاركة واحدة

12-08-2018, 02:24 PM

اقتباس:

المشاركة الأصلية كتبت بواسطة قطرات الندا

هلا وسهلا بابو نجلا والبدراني ومستكفه وصامده وظل وامل حياة يارب تكونو كلكم بخير وعافيه .
ابو نجلا اخبارك الاخيره تقل بشاير والله وصدقني بتكون احسن واحسن تتذكر قبل رمضان يوم كنت متأزم من ركبتك ؟ شف الحين الحمدلله بديت تثنيها والعافيه تحي شوي شوي .
اتذكر وانا صغيره جتني صخونه قويه وطحت طيحه قشرا وانا اصلا شيطانيه وحركيه وصرت ماغير طايحه بالفراش واقول لأمي الله يرحمها يمه متى اطيب ؟ قالت العافيه مثل البيت اذا جينا نبنيه شوي شوي مايبنى على طول بتتعافين وترجعين احسن من اول ورسخ هالكلام براسي ان المرض يهد الحيل كني هدمت بيت وقاعده ابنيه من جديد وانت بحول الله انك بتصير احسن واحسن صحيح التحسن بطيء بس بتوصل للعافيه التامه بحول الله بس انت حط هالكلام براسك والله ماراح يخيب ظنك ابد .
البدراني عسى عمرك طويل تعيش وتضحي الله يتقبل منا ومنك .
مستكفه الله يسعدك ويرزقك راحة البال والسعاده .

هلا بك يا قطرات الندا

إي و الله الحمدلله على ما قضى و قدر

صادقة كنت متأزم كثير أذكر أبوي دخلته علي بعد العملية و جاب القهوة و القدوع و كنت متأزم نفسيا كثير لأنهم الكلاب الدكاترة النفسيين في البرج الطبي دخلوا علي و لا عطوني منوم و كنت أسهر و تكثر علي الهواجيس مع اني قلت للدكاترة النفسيين علاجاتي لكن طنشوني تطنيش قهرتهم بالله بس

المهم شافني أبوي منسدح قلت له ماني متقهوي و غطيت نفسي بالشرشف من قهر الهواجيس المهم ترك القهوة و القدوع و مشى و جا على بالي إني راح أكون حبيس البيت و مشاكلي راح تكثر بالبيت و أنا عادتي أهج من البيت أبغى الفكة عشان المشاكل و عادتي أحب الحرية و الإنطلاق و لا أداني الأربع جدران

حتى وقت ما هي مجبسة بالجبس كنت أنزل متثاقل بالعكازين و ثم أجلس على الرصيف مثل المجنون حالتي يرثى لها أطلب من ولد عمتي اليتيم يجيب لي شاهي و الا كافي حليب من البوفيه ما أحب البيت أبد و يجي في بالي إني ما راح أثنيها و إن الألم اللي بالركبه راح يظل فيها للأبد

و شوي شوي كنت أعصر ركبتي عصر في الثني ودي أثنيها مرة وحدة و لقيت الجهد و الجهيد و الحمدلله الحين أشوى بكثير بكثير له الحمد و الشكر و الفضل و المنة

كنت أقرا في إصابات الركبه و لقيت واحد يسأل دكتور و يقول يا دكتور أنا سويت عمليه بالركبه و مرت 8 شهور و لا أثنيها بالكامل . لما أتذكره أحمد ربي على اللي وصلت له . و قريت في واحد يقول ما يقدر يمد رجله و يثنيها إلا بواسطة الإستعانة بيده و الآن عرفت و حمدت ربي على النعمة اللي أنا فيها

صحيح فيها طقطقة و ألم خفيف بس متأقلم مع الوضع كثير و بإذن الله ما تبقى الحدايد طول العمر و الله يجبر الصابونة و يبعد عنها الوجع

اقتباس:

اتذكر وانا صغيره جتني صخونه قويه وطحت طيحه قشرا وانا اصلا شيطانيه وحركيه وصرت ماغير طايحه بالفراش واقول لأمي الله يرحمها يمه متى اطيب ؟ قالت العافيه مثل البيت اذا جينا نبنيه شوي شوي مايبنى على طول بتتعافين وترجعين احسن من اول ورسخ هالكلام براسي ان المرض يهد الحيل كني هدمت بيت وقاعده ابنيه من جديد وانت بحول الله انك بتصير احسن واحسن صحيح التحسن بطيء بس بتوصل للعافيه التامه بحول الله بس انت حط هالكلام براسك والله ماراح يخيب ظنك ابد .

كلامها الله يرحمها و يسكنها فسيح جناته يبري الجرح
أنشهد كلامها في محله و ما شا الله عليك ما يغيب عن بالك شي
في نقطة إنو لما يخف الإكتئاب و تتحسن النفسيه يصفى الذهن و يسترجع الإنسان ذاكرته و تتحسن يصبح الفهم سريع و منطلق في الحديث بعكس لما يداهم الإكتئاب صاحبه تتعطل قدرته على التذكر و الحفظ و الفهم و يهد الحيل الله المستعان

راح أتحسن بإذن الله و كل أموري راح تتحسن سأثق بذلك تماما و لن يخيب الله عبدا رجاه و أنتم كذلك ثقوا بأنفسكم ذلك

الله يشفيكم جميعا و يقويكم و ينصركم و يسعدكم دووووووم نقرتين لعرض الصورة في صفحة مستقلة