نفساني - عرض مشاركة واحدة

20-08-2018, 05:09 PM

يشهد الله غيمه مابيك تبكين ولا تحزني لكن ابي كل اللي موجعك يطلع فرغي كل احزانك احذفيها خارج جسدك وروحك وعقلك صدقيني حبيبتي اذا ظليتي محتفظه فيها بالداخل الحياه راح تكون صعبه عليك و موحشه .. صحيح اني انصحك وانا بنفسي مريت بحالات قلق واكتئاب لكن ما استسلمت ابد كنت ملي ثقه بالله سعيت وحاولت وعملت علاج سلوكي عند كذا اخصائي وتجاوزت نصف المرحله وفي الاخير اخذت دواء يعالج النصف المتبقي وهو الاعراض الجسديه وقبل كل هذا شعوري ويقيني بأن الله لن يتركني وحدي ابدا .
تأكدي ان السعاده حق من حقوقك لازم توصلين لها انا والله احزن لما اشوف بنت باجمل عمر تعاني . صحيح الظروف والمحيط يحكمون الشخص لكن اخلقي سعادتك اعملي صداقات اكتشفي شغفك وين .
يمكن كلامي يضايقك لأن بتقولين مالي حول ولا قوه بقولك اوكي اتبعي ابسط الطرق وهي انك تفرغي كل شي بالورق بعدها برمجة العقل راح تتغير وتجذب لك اشياء ماكنتي تشوفيها قبل بتصيرين من جوا بيور ورؤيتك اوضح للاشياء وردات فعلك كمان بتكون غير .
غيمه انا كنت عصبيه لدرجة ان جسمي كله يرجف واسناني تضغط على بعضها لاتفه سبب بعد مابديت العلاج السلوكي ابتديت اهدا ختى ارتفاع ضغط الدم ابتدا يستجيب ويكون بمعدلات طبيعيه عندي قناعه انه مافي اهم مني عندي ولا اهم من صحتي ومزاجي والشخص اللي ينكد علي ارميه من حساباتي حتى لو قريب اتعامل معاه بما يرضي الله لكن اقفل مشاعري يعني مايهزني لاكلامه ولا تصرفاته معاي .
ابيك تبحثين عن قانون التعلق وفك التعلق وهو باختصار من تعلق بشي جعله الله سبب عذابه .
اللي يتعلق بالمال يخسره واللي يتعلق بحبيب يهينه واللي يتعلق بولد يموت صحيح احنا بشر تحكمنا مشاعر لكن احط لهالمشاعر حدود بمعنى اي شي واي شخص يتعبني اشيله من حساباتي .
انا كثر ماتعلقت بأبوي بغيت انجن يوم توفى قعدت سنه كامله ماصلي فرض فيني غضب وزعل الى ان جاني موقف يوم كنت مسافره برا السعوديه وتعرضت لعملية نصب سيئه وكنت بدخل بورطه كبيره من غير شعور قمت توضيت وفرشت شرشف الاوتيل حتى مامعي سجاده وصليت ودعيت ربي انه يطلعني من هالازمه بغمضة عين تغير كل شي وانتهى الموقف بخير .
بعدها عرفت ان ابوي من الله والله خذاه لكن مالي بهالدنيا قوي غير الله هو اللي بيده فرحي وحزني وفرج همي . اقتنعت وارتحت ورجعت لصلاتي يارب لك الحمد .
كثرت عليك الحكي سامحيني لكن انا اكبر منك سنا وحزينه انك بهالسن وتعانين .. انطلقي وقولي انا استعد للفرح والحياه وخلي بكره لبكره وامس انسيه تماما ولو طرالك غصب قولي طز .
ربي يوفقك

ظل امرأة معجب بهذا