نفساني - عرض مشاركة واحدة

06-09-2018, 11:12 AM

صباح الخير على الجميع
اليوم اكملت ثلاثة اشهر بالضبط من استخدامي دواء برنتلكس وحبيت اكتب لكم تجربتي لعل هنا من يسأل عن الدواء ونتائجه ويستفيد .
من شهر نوفمبر ٢٠١٧ الى يونيو ٢٠١٨ مريت باعراض جسديه ونفسيه ماكنت اظن اني بطلع منها ابدا لشدتها والمها نفسيا وجسديا من دوخه وقلق وخفقان وخوف و توجس وارق وضيق كنت احس نفسي اني بحلقه محكمة الغلق ولا اشوف فتحه اقدر طلع منها تلاشت متعتي بكل شي حتى الاكل وحتى ممارساتي المحببه اليوميه مثل الشاور والمسلسلات احس اني بدنيا اخرى كئيبه .
استخرت الله سبحانه واخذت الدواء في شهر يونيو في بداية الايام زادت الدوخه والغثيان ومعد صرت اكل ابد ومعد اتحرك من الفراش تهب وشعور بالسقوط والاغماء حتى صلاتي قصرت فيها لكن بعد العشره ايام ابتدا النور يظهر وابتدت الاعراض تخف بتدرج بطئ لكنه مفرح بالنسبه لي لأني كنت حيرانه بنفسي ومع الايام اختفت الدوخه الا من بعض ثواني تجي دوخه سريعه وتختفي اختفى الخوف نهائيا انتهى تماما الغثيان ابتدت الشهيه للاكل ترجع ابتدا المزاج يتعدل والهدوء يتسلل لروحي .
تصدقون ان امرأه تقعد ٨ اشهر ماتطب مول ولا سوق ؟ انا مرت علي هالشهور ماشفت الشارع الا للدكتور ومواعيدي بالعياده النفسيه والمشي ساعه يوميا .
رجعت لصديقاتي وابتدت الحياه تهدأ وتستقر من جديد .
الخلاصه في الموضوع واللي انا فهمته بالادويه النفسيه انها مش مسكن الم وحبه سحريه تاخذها وتشعر بالسعاده لا غلط الدواء النفسي طريقة شغله بالجسم عجيبه تحسنه بطئ لكنه ملموس يرجعك لأنت الاول لكن بهدوء عجيب وهنا مربط الفرس ان كنت ترى الايجابي اكثر من السلبي وانت اصلا شخص ايجابي راح تتناسق مع الدواء بطريقه جميله وتستفيد اكبر استفاده وان كنت شخص سلبي لاترى الا السواد فالدواء شغله معاك صعب . لاحظت كثير ممن يستخدم الادويه النفسيه انه يترك كل الايجابيات ويركز فقط على اعراض بسيطه مزعجه ممكن تمر اصلا على شخص طبيعي مايعاني ابدا من اضطرابات نفسيه ويقعد يلعن الدواء او الظروف او المرض .
الحمد والشكر لله هي الداعم الاساسي الاول وتذكر ياعزيزي انك سواء رضيت بوضعك او مارضيت المكتوب عليك راح تشوفه والدنيا ماشيه .
الله يكتب لنا ولكم الخير والعافيه التامه والسعاده

المصدر: نفساني