المشاركة الأصلية كتبت بواسطة ياسر هلعاوي

استفتحنا بالله وخاب كل جبار عنيد

اخواني شفاني الله وإياكم من كل مرض نفسي وجسدي

ابي مساعدة من اهل الخبرة والاختصاص في مشاكل الهلع وأعراضه
بحاول اختصر لكم عشان ما يكون الكلام ممل لبعض الإخوان
انا عمري 30 سنه والحمدلله اجتماعي جدا وموظف قطاع خاص و اشوف نفسي زي اي شخص عايش حياته و افضل بعد

بدأت قصتي ببداية 2017 كنت مخلص شاور وجالس بالصالة اطالع التلفزيون وافصفص واشرب شاهي فجأة وبدون مقدمات حسيت بدوخة قوية جدا ورجولي ماعاد تشيلني زي ما يكون بيغمى علي او زي احساس الجوع لكن بشكل أعنف لدرجة ما سيطرت على نفسي و على طول انسدحت بالصالة
اتصلت في اخوي واخذني لقسم للطوارئ وسووا فحوصات وتحاليل والنهاية كل شي سليم !
كيف سليم وانا قبل شوي بيغمى علي !

طلعت من المستشفى وفيني خوف و توتر احس بأصرخ وأبكي بس ماني عارف ليش
ورجعت البيت وعجزت انام من التفكير ايش هذا وغريبة كيف حصل و ليش ولماذا وماذا حصل !!
المهم دخلت في دوامة تخمينات يمكن داخلني برد يمكن هبوط جوع يمكن ارهاق يمكن يمكن يمكن ... الخ
بديت يوم جديد و بدأت مرحلة التنزه بين الأطباء بكل المستشفيات وكل التخصصات اذن و باطنية و أعصاب و عام ماعاد باقي الا النساء والولادة ولو كان مسموح ادخل بدخل المهم اعرف وش فيني
وكل الزيارات هذي تنتهي بأن النتيجة سليمة مافي اي شي عضوي .
والله يا اخوان اتمنى يقول الطبيب فيك سرطان واعرف وش فيني عشان أركز عليه لكن انا ضايع وابي احد يدلني على طرف خيط
واللي يقهر ان عشرات الأطباء اللي زرتهم ولا واحد فكر يحولني لطبيب نفسية .
من غير المعقول كلهم جهلة في موضوع النفسية وتبعاتها واعراضها

طيب ايش الموضوع ايش فيني بالضبط قبل 2017 مافيني اي شي وكنت من عشاق السفر والرحلات البرية واجتماعي جدا جدا
ومن بداية 2017 اختلف كل شي بمجرد جاتني الدوخة هذي !

طبعا بعد 4 شهور ودخول في المواقع قريت مواضيع عن النفسية وان لها تأثيرات على الجسم ماتخطر على البال .

وبالنهاية قررت زيارة طبيب نفسي وشخص ان اللي فيني نوبات هلع و صرف لي باروكسات حبة يوميا 20 ملغ .
طبعا بديت فيها بدون تدرج حسب كلام الطبيب وخامس يوم سببت لي خوف وقلق زيادة عن المألوف وخفت منها وبطلتها

اعراضي اللي احس فيها بداية الهلع ولمدة تقريبا 6 شهور :

* دوخه او شد في الراس من الخلف مع ثقل او نعاس قوي صعب اشرحه
* خفقان مفاجئ وقوي
* مشاكل باطنية الام معده
* صرت اخاف اروح اي مكان لحالي
* صرت اتجنب الاجتماعات عكس حياتي قبل 2017
* اتحسس من اي شي واحس تعب بسيط ممكن يسبب لي مضاعفات مثلا الزكام كلنا نشوفه طبيعي لكن انا احسه عرض لمرض خطير
* التوتر اذا فيه طلعة لأي مكان حتى لو انا متعود اروح المكان هذا

نوبات الهلع نفسها كانت تجيني كل يوم وبعد كم شهر خفت صارت كل يومين او ثلاث وبعدها خفت كثير لكن مشكلتي الآن هو التأثير النفسي اللي يجي بعد نوبات الهلع من خوف وقلق و اوهام مرضية وخمول ومزاج سيئ ويروح يومي كله تفكير وترقب وانتظار متى النوبة الجاية ووين بتجيني بالبيت او العمل او المسجد او السيارة

اما الايام هذي صرت احس انها رجعت لي نوبات الهلع لكن بشكل غير عن قبل مثل خفقان قلب مفاجئ و كتمة بالنفس و وجود شي متعلق بالحلق ورعشه باصابع اليد واهتزاز بالجسم مع عدم الطمأنينة والتوتر والتفكير في الأمراض و مراقبة اجهزة الجسم

الآن أروح و أجي و اسافر بالسيارة لكن يوجد قلق بسيط وتفكير يعني يروح اغلب يومي افكر بالنوبات و اذا دخت وش بيصير لي لكن بشكل خفيف ما يمنعني من شي بس اشوف ان التفكير هذا يفسد علي يومي ويستهلك طاقتي

المعذرة على اسلوبي بالكتابة وعدم تنسيق الكلام

ابي رأيكم و مشورتكم حفظنا الله وإياكم