المشاركة الأصلية كتبت بواسطة قطرات الندا

هلا وغلا مبتلاه
توي انتبه لهالموضوع
انا امرأه ابلغ من العمر خمسين عام ولله الحمد والمنه قضيتها كلها بسعاده ودلال وراحة بال مع والدين اكاد اجزم انهم اروع ام واب في الدنيا تربيت تربيه معتدله لاتشدد ولا افراط كان ابوي صديقي وامي ملجاي .. من عمري يوم واحد الى السنه اللي فاتت قبل رمضان ماعانيت من شدائد ولا مشاكل الحمدلله لم يسبق لي الزواج وراضيه وسعيده باختيار الله لي .
ابتدت مشكلة الهلع مثلك تماما قبل رمضان السنه اللي فاتت دوخه وعدم توازن وضربات قلب مرتفعه وشعور بخوف غريب ماعرف مصدره رحت الطوارئ سويت تخطيط قلب وفحص ضغط جاني دكتور الله يسامحه قال روحي مستشفى كبير معاك قصور بالقلب ومن يومها انا مو انا رحت طبعا لاستشاري امراض قلب واوعيه دمويه عملت تحليل لانزيمات القلب وتخطيط قلب وايكو واختبار جهد وكلها سليمه لكن عقلي الباطن اختار يصدق دكتور الطوارئ وابتدا مشوار شراء الاجهزه من اجهزة الضغط ونبضات القلب الى.جهاز قياس الاوكسيجين بالدم الى تحليل السكر ... الخ
صارت تتكرر علي نوبات الدوخه بعدها ابتديت ادخل بنوبات ضيق وخوف وصرت ما انام الا عندي احد ومن اصحى اروح لصديقتي فكرت واخذت موعد مع طبيب نفسي بالخبر رحت الموعد وجلست معاه ساعه وانا ابكي اقوله مدري وش فيني فجأه انقلبت حياتي قالي هذا هلع واعطاني سيبرالكس ورجعت البيت وقريت اعراضه الجانبيه ولا اخذته وبعد فتره من البحث شفت مدح بالنت على دكتوري الحالي اخذت موعد ورحت وجلست معاه ساعتين وعمل لي اختبارات واسأله كثير قالي معاك اكتئاب وقلق حاد سببو لك كل الاعراض اللي تمري فيها وكنت رافضه الادويه وقالي مافيه ادويه فيه علاج سلوكي وابتديت احضر جلسه كل اسبوع والحمدلله فيه تحسن من ناحية ضربات القلب والخوف لكن الدوخه مستمره والحزن الغريب اللي بداخلي المهم بعد صراع كم شهر استخرت ربي وتوكلت على الله وعطاني برنتلكس في بداية العلاج عانيت من اعراض جانبيه جدا مزعجه زادت الدوخه وفوقها غثيان ووهن بجسمي وتعب لكن سبحان الله الخوف اختفى وشوي شوي ابتدا التحسن وابتديت ارجع لطبيعتي لكن ما اخفي عنك تجي من فتره لفتره دوخه بسيطه واطنشها واحيانا اكون بجمعه مع بنات واحس بضيق ابي اطلع ومشت الحياه بفضل ربي .
الخلاصه اني عرفت اتعامل نوعا ما مع الاعراض واتقبل الوضع وارضى فيه ولازلت اخذ برنتلكس على جرعة ١٠ مل ولله الحمد اموري ماشيه بس صايره اكل اكل عجيب كني مفجوعه زاد وزني شوي مو كثير بس متقبله الوضع كما هو المهم ما ارجع للي شفته العام الماضي .
برمضان القادم ان شاء الله اكمل سنه كامله من اول يوم اخذت برنتلكس ولا عندي اي مشكله باني استمر عليه سنه اخرى او سنوات المهم ما ارجع للي شفته .. وسلامتك