المشاركة الأصلية كتبت بواسطة ا،السويدي

السلام عليكم ورحمة الله وبركاته ،


أخباركم ؟ من زمان عن المنتدى ..

مادري ليش فتحت الموضوع ولا ادري الصراحه شو اكتب بالضبط. هل اللي بكتبه بيريحني؟ ولا بحس ان في وايد اشياء ما كتبتها.
الصراحه مشاعرنا ويا الوسواس أبداً مب مفهومه. مشاعر غريبه وعجيبه مانقد نتحملها والله. والله المُستعان.

امم حالي ما تغيّر أبد.. بس مثل أي حد فترة أكون بخير وفترة ماعرف شو فيني بالضبط؟

في رمضان الصراحه كنت مرتاحه جداً وكان رمضان خفيف وحلو، يمكن تضايقت مره ومرتين ونوبة هلع خفيفه لكن الحمدلله أحس مر خفيف
و اول يوم العيد كذلك وثاني. لكن من ثالث يوم لين هاليوم مادري شو اللي صار فجاءه ؟ ماذكر ان صار شيء وضايقني أو شيء ، بس فجاءه هالمشاعر هاجمتني.

مادري من وين ابدأ ؟
طبعاً في رمضان كنت ما انام الليل يعني اسهر و انام بعد الفجر ،
لكن لما خلص حاولت اعدل النظام بس ماقدرت..

يعني تقريباً ارقد الليل حوالي الساعه او الساعتين بعدين اصلي الفجر و الصراحه ماقدر انام ابد الى الظهر
احاول انام لكن ماقدر..

غير ان نومي نظامه سيء.. أحلامي أبداً مش مفهومه قسماً بالله
يعني مادري انا شو قاعده احلم ؟ يمكن اغلبها تكون من الاشياء اللي تصير وياي خلال يومي كله لكن مادري ليش اتضايق واحس بغربه ؟

يعني تعرفون يوم تحلمون كذا حلم وقت واحد ؟ نفس الشيء بس بشكل غريب..

مثلاً اتابع مسلسل هالفتره ، ف الحلم يعني اما يكون مقاطع من المسلسل او حدث صار بيني وبين أختي أو مادري

ادري طبيعي يعني تحلمين عن هالاشياء بس ليش انا احس بضيق من الحلم ؟ واول ما افتح عيني احس بكتمه.. واحياناً احلم بالاموات اللي اعرفهم. مع انه احياناً ما افكر فيهم يعني مادري ليش احلم عنهم ؟


يعني باختصار يومي كئيب. أوكي آكل اشرب الحمدلله ، اسولف اضحك ابتسم لكن احس اني بموت !
يعني كل هالمشاعر والاحلام واي شيء يصير كله مرتبط اني بموت.. كيف اشرح لكم ؟ اتمنى فهمتوا ،

وصايره حساسه بزياده ! يعني اتأثر بالمسلسلات بشكل غير طبيعي مع اني قبل ابداً ما كنت جي ههههههه ،
تصدقون ؟ أحس ان حتى المسلسلات اربطها بالموت ؟ يعني اي حدث حتى لو تافه تلقائياً ينربط بالموت.



أنا ادري ان هالشعور اكيد مر علي. و الصراحه يعني احس اني اذكر متى ،
لكن في نفس الوقت أحاول اذكر ماقدر و احس شعور يديد غريب أو يمكن مر علي لكن هالمره غير عن قبل ..

تعبانه والله ،، ماعرفت شسوي قلت افضفض. واتمني القى رد يخفف عليّ ولو شوي.