وحدآني

بيانات اضافيه [ + ]

رقم العضوية : 47974  تاريخ التسجيل :  07 2014  أخر زيارة : 18-05-2025 (01:44 AM)  المشاركات : 29 [ + ]  التقييم :  10

لوني المفضل : Cadetblue

انا مليت خلاص ، اكتب لكم تجربتي

السلام عليكم

كيف بدا معي المرض

في الاول كنت انسان طبيعي 100 بالمئه ولله الحمد
حتى وصل عمري 23 ، كنت متدرب في شركه ومسكنينا في غرف
وانا داخل الغرفه كنت اللعب بلاستيشن ادمان ، جاني شعور فجأه وكأنه الموت غصه اختناق اذني سكرت عيوني دمعت ركضت برا الغرفه علشان اطيح برا يشوفني اي احد وفجأة راحت ، خفت من هذا الشعور كلمت الوالده علمتها بالي حصل قالت حصن نفسك ، المهم كنت هذاك الوقت مدمن حمضيات افتحه ويجلس معي ساعه ودخان ، بعدها شعرت بخمول بعد شرب الحمضيات، صرت اشرب شاي بكثره ،
المهم رجعت لي الحاله مره ثانيه في رمضان بعد السحور ثواني وراحت ، هنا بديت اخاف اليوم الاول والثاني وتلاشا الخوف مع مرور الزمن ، بعدها لاحظت اني اخاف على نفسي واجد وجاني شعور خمول وما احس بنبضي اقعد استشعره بيدي، المهم رحت اتعشى اكل هندي حار مع خويي فجاءه جاني شعور خمول قوي لدرجه احس بجهاد كبيييير لما ارفع يدي ومعه خوف ورعب وهلع ورحت للطبيب عطاني ابره حقت بطن ومغذي وقال مافيك شي يوم قال مافيك شي لاشعوريا قمت اصيح مثل الطفل بكاء مايوقف حسيت براحه كبيره جدا بعد البكاء قلت يادكتور انا فيني شي قال رح نام بس ، المهم قام يجيني هالشعور بعد الاكل مع بقاء الخوف والهلع والوساوس مستمره طوال اليوم , صرت مقدر اسافر لحالي واخاف العزله وما انام لحالي واخاف من دخول الحمام واقفال الباب ما احب اقابل احد اترقب للامراض والموت ، الاخبار السيئه تخليني ابكي واحس انا القادم راحت الوساوس عن نفسي صرت اوسوس في والدي وصرت ابكي بكاء الطفل عليه وعلى كبر سنه ، سبحان الله والله العظيم انها اعراض مثل السحر شي شي عظيم يا اخوان اكثر من 1000 عرض خفقان نغزات القلب نبض البطن شعور بالتعب العام نزول الوزن حاد ظهور التعب على الوجه وكل من شافني قال سلامات وش فيك وهذا زاد الطين بله مقدر اتكلم ، اكره طاري المستشفى او الطبيب نهائيا واكره زيارته واحس برعب لايوصف بكل ماتحمله الكلمه من معنى ، بديت احس بتنمل بالاطراف مرات عرق اليدين ومرات حراره فجائيه بالجسم مع ان الاجواء بارررده ، صرت اخاف من الاكل لانه يزيد اعراضي واكل نواشف خفيفه ، قرأت عند مشايخ تحسنت نفسيآ قليلا لكن الاعراض تجي وتروح
مرات احس احد كب علي ماء بارد من راسي الى قدمي ، ومره جتني نفظه بالليل جسمي كله ينتفظ وابكي وقول لأمي وش فيني قالت شكلك بردان تلحف وانتفظ داخل البطانيه لين راحت ونمت ، وقامت تزيد الوساوس والخوف والهلع , وصلت فيني المرحله ان شعور النعاس والنوم ما اعرفه وافسره على انه شعور الاغماء وصرت ما انام وصرت اكش من ظلي في اكثر من مره ، يعني اقول بيني وبين نفسي هذا ظلي بعد خمس دقايق المح شي وراي واكش الا ظلي هو نفسه وتكررت لأيام ، صارت تجيني زي الغصه لما اتكلم مع الناس واقعد اقطع بالكلام بسبب قوه الخوف والوسوسه ، شرحت الحاله لامي قالت لاتروح طبيب نفسي انت منت مجنون ، يمكن هذا عين ، جلست اقاوم هذي الاعراض وكل من شاف وجهي لاحظ التعب ، المهم قلت بيني وبين نفسي لازم اقاوم وكنت أقول ياجماعه هذا الشي من بطني مع اني ما احس اي اعراض بالبطن مثل الالم والاسهال ، المهم صرت اخاف من الصلاه لان فيه واحد صلى ومات وصرت ما احب السكينه بالصلاه تشوفني احك يدي امسح وجهي اهتز احرك اصابعي توتر وقلق شديد ، جلست اقاومها 3 سنوات ثم خفت بنسبه 80 بالميه والان يجيني شعور النبض المحسوس كنت اسمع دقات قلبي دو دو دو والدقات تخليني اتووووووتررررررر واحس بتعب عام ولما اوقف احس قلبي يدق اسرع ثم يخف وكنت اروح الطبيب يقولي دقات قلبك سريعه وعندك نبض عالي وكنت اقوله من بطني العله وانحاش منهم ما ارجع لهم مره ثانيه ، جاني اكتئاب شديد ما احس بلذه الحياه ولا لها طعم وكل من قال اعراض نفسيه كنت اقول بيني وبين نفسي اجل الي يصير بجسمي شنو كل واحد ادرى بنفسه ، ودايم اقول يارب وش ذا الي فيني وادعي ربي بالعافيه بكل سجده ، كل الحالات النفسيه قدرت اسيطر عليها ولله الحمد ، الا الجسميه وهي النبض صدق موترني ومرات احس بتعب من غير سبب واضح ، والنبض مستمر يخليني اتشتت ذهنينا ويزيد من الوساوس الي اقاومها

المصدر: نفساني