|
احتاج نصايحكم حول حالتي جزاكم الله خيرا
السلام عليكم
ببدى بمشكلتي
قبل سنه وشهور وانا طالع من النادي
بعد ماتغديت وارتحت
جاني صوت بالاذن زي الضغط
وجفاف بالحلق وخفقان طلعت برى البيت الظهر
وجالس امسك حلقي احس روحي بتطلع
على طول رحت المشفى وسويت تحاليل وكلها سليمه بفضل الله سبحانه
رجعت البيت وتعبت ورجعت المشفى وتخطيط قلب وتحاليل دم والحمدلله سليمه
جلست شهر وشوي وانا ما اكل نهائي الا سوائل لدرجة اني نزلت فوق 15 كيلو
لاني اخاف اشرق بالاكل بعد ماحسيت بالجفاف بالحلق ، وطبعا طول اليوم المويه بيدي، وطبعا كل يوم بفراشي انتظر الموت وكل يوم اطلع مرض جديد
بعد مالفيت كل المستشفيات ، رحت للطب النفسي ، وصرف لي الدكتور سبرالكس 10 م
ودوقماتيل 50 مره باليوم ، الحمدلله تحسنت بعدها ، ورجعت اكل طبيعي وزاد وزني
وكانت تجيني هالنوبات قليل ، ومره صحتني من النوم بس شغلت رقيه ونمت ،، والحمدلله
من وقتها معاي ضيق نفس او بالاصح مو ضيق
هو صعوبة التنهد يعني احس اني بحاجه اتنهد بالمره الاولى ماقدر واحاول ثاني وثالث حتى ماتنهد وارتاح ،
عموما خلص علاجي وتركت الادويه شهرين وبعد الشهرين رجعت تعبت ورجعت لدوامة المستشفى،
ورجعت لنفس ادويتي ، انا ماعندي مشكله بالادويه بالعكس ، ولكن شفت اني قادر اصببر بدونها .
المهم استمريت ع الادويه شهرين تقريبا وجاني عارض اخر وهو الدوخه وطول الوقت طايح ، شعور اقرب ماله مثل شعور الصخونه ولما يدخلك برد بس مافيه صخونه ، رحت حللت كل التحاليل والحمدلله سليمه ، بس ان هالشعور مايخليني اروح واجي وخصوصا اني العب رياضه اضطريت اترك النادي اسبوع وصرت اروح على خفيف
الاشيا اللي بسال عنها
* انا تجيني نغزات جهة القلب لكن النغزات مو مؤلمه ولكنها تغث، سويت اشعه على الصدر والقلب وتخطيط قلب اكثر من مره وتحليل انزيمات القلب؟ هل هي كافيه، واللي فيني مجرد قلق؟؟
* الشي الثاني انا جاني عارض التنهد وتجاهلته النغزات وتجاهلتها ، لكن الدوخه اللي احسها صعب اوصفها تجبرني بس بكون بنسدح وماسوي اي مجهود؟ هل هي بسبب القلق؟ معليش الشغله كنها تحدي يعني يروح عارض ويجي اقوى منه :(
* قبل يومين وانا ماسك الجوال وبنام ، جاني تنميل بايدي طبعا متعود يجيني بس يكون عادي خفيف بس تحرك ايدك يروح بس هالمره جاني تنميل قوي وتقريبا شعور اني بفقد ايدي او ماراح احس فيها ، شعور جدا مفزع بس ماطول معي بس جا معه قلق وتنهدات وومانمت الا الصباح ، ياترى وش سبب هالشعور؟
* تنصحوني ارجع لادويتي وارفع جرعة السبرالكس؟ لان حاليا قاطعه لي شهر من بعد ماجتني الدوخه وقفت الادويه لاني حسيت انها مافادتني
،،
وبالاخير اعذروني على العشوائيه ولكن كل ماكتب اتذكر شي واعدل ، والله الاعراض متعبه لدرجه تحس انك تعبان ولو احد يسالك وش متعبك او وش تحس؟ تقوله مدري بس تعبان :(
|