المشاركة الأصلية كتبت بواسطة نوووووووف

السلام عليكم ورحمه الله وبركاته


رجعت لهنا بعد حوالي 5 سنين، ما أعرف ليش رجعت او ايش بقول
اولا كل عام وانتم بخير والله يعيده علينا واهالينا بصحه وعافيه.
شفت بعض اليوزرات المألوفه علي من ذاك الوقت ووالله ضاق صدري
اني شفتهم مو من شيء لكني تمنيت يكونون طيبين وعاشو.

اصابني وسواس الموت في عام 2014،
صحيت من النوم مفزوعة ومن ذاك اليوم تغيرت حياتي.
اول سنتين مرت شديدة وقاسية علي بشكل ما اقدر اوصفه. كنت ماادري وش فيني
امي تجيب شيخ يقرا ومويه وكل شيء.. يمر يومين احس اني افضل وبعدها نرجع للموال طبعا ما اتوقع يحتاج اذكر الاعراض الي موجودة بالاغلب اذا مو بالكل
المهم بعد يمكن سنتين من الارق والتعب رحت لطبيب نفسي، شخصني باكتئاب مع اني ذاك الوقت كنت اظن الي فيني وسواس قهري
وقالي الاكتئاب مسبب للوسواس، صرف لي أدويه وماكلتها -للاسف-
حدد لي جلسات مع اخصائيه ولا استمريت -للاسف-
كنت خايفه من الادوية عشان كذا ماكلتها اما الجلسات انا رحت للاخصائيه يمكن جلستين وقالت لي كلام انا اعرفه وحافظته فما كملت
مع اني غلطانه مفروض اكلتها ومفروض بما اني ماارتحت معاها حولت على شخص اخر، لكن ان شاء الله انها خيرة.

نجي إلى مابعد ذلك،
تحسنت وتحسنت كثييييير ولله الحمد.
يمكن عشاني عرفت ايش فيني فصرت افهم؟ ما اعرف لكن الي اعرفه اني تحسنت كثير عن السنتين الاولى وحسيت اني خلاص اعرف اتعايش مع الموضوع.
عانيت مع الاكتئاب وكنت اكذب على نفسي اني اقدر اعيش معاه وفعلا مرات اعيش ومرات انتكس
طبعا كيف قدرت اتعايش مع الوسواس؟ اني ادعي ربي يطول بعمري هههه
تدرون ماقد اعترفت لاحد بهذا الشيء لكن اذا مادعيت احس اني بموت فمحدده لي اوفات باليوم ادعي فيها والايام الي احسه زايد يصير بين الاوقات عادي بعد
يعني عادي اوقف مسلسل عشان ادعي ثانيتين ان ربي يطول بعمري وارجع اكمل هههه!!!! يالله شر البلية مايضحك فعلا.

المهم زي ماقلت لكم فتره اتحسن وفتره ارجع ومع ذلك حتى الرجعة ماكانت بالسوء الي قبل يعني يجي مناسبه اقول ماراح الحق ووو لكني كنت احاول اني اتجنبها...

لين ماجينا الى وقت الكورونا.....
لا طلعات لا اي شي يشغلك
اول الايام مرت بسلام اتوقع كان الجميع مو فاهم وش صاير فكنا طايرين بالموضوع
يوم ويوم ويوم
والوساوس تزيد
وبرمضااان وكورونا!! طبعا مايحتاج اقولكم برمضان! ماعرف ليش يتسلط بكل رمضان.
آيه فيها سجود اسجد وانا خايفه مااقوم...
اشياء كثيييره اتوقع كلكم عارفينها
زرت الموقع خلال هذي الفترة كنت ابي اهدا ان الموضوع وساوس وانا مريت بهالشيء من قبل بس طلعت على طول.

اليوم كنت بختم القران، طبعا خوف بختمه وبموت ووو
المهم حاولت اتجاهله واكمل لكن ماامداني لاني قلت بدعي قبل لا يأذن وبكرا باذن الله اختمه
جلست على سجادتي دعيت وصحت
طبعا نسيت اقولكم الصياح ملازمني يوميا هههه
المهم فجأه جسمي كللله احتر وقلبي يضيق واحس اني خلاص بودع
طلعت الصاله لقيت امي شفتها وصحت عندها عن الشهور الي فاتو
وماكان ودي ماابي ازعلها معاي لكني ماقدرت كنت خايفه وارجف وقلبي يعورني
تعبت اقسم بالله اني تعبت وادري انكم تعبتو زيي
الله يعظم اجرنا يارب العالمين.

وفعلا كنت احسني بموت بذيك اللحظه
ومامت.

ماادري ليش كتبت لكم كل هذا احس كثرت مره بس كنت محتاجه اكتب واقول
لاني اشوف نفسي ارجع انسحب لهالدوامة اللي للاسف ماطلعت منها لكنها كانت اخف

رحت ادور يوزري حتى كنت ناسيته ولا توقعت اني بذكر الباسوورد هههه
انا ناويه ارجع اروح طبيب من جديد لكن لما تخف ازمه الكورونا باذن الله

بما اني نكدت عليكم
بقول لكم شي يضحك شوي

انا جاني الوسواس واهلي كانو مسافرين وكنت احس اني بموت وماراح اشوفهم
وجو وشفتهم ومامت
جاني الوسواس وكان عندنا مناسبه وكنت اظن اني ماراح احضرها
وحضرتها ومامت
جاني الوسواس وانا ببداية سنواتي الجامعية وكل ترم كنت احس اني ماراح الحق الي بعده
وتخرجت ومامت
،اشياء كثير انا متاكدة انتم بعد عشتوها

6 سنين من حياتي مرت انتظر الموت
يالله!
شي عجيب صدق.


يالله الشفاء عاجلا غير اجل.