المشاركة الأصلية كتبت بواسطة عيون متفائلة

السلام عليكم ورحمة الله وبركاته

حياك الرحمن اختي و كل عام انت و كل أحبابك بخير و جميع المسلمين


رأيي من رأي الأخوان ليتك تعطين نفسك فرصة كم شهر لين يظهر أثر العلاج و لا تستعجلين بالرد .. نصيحة بعدين قرري .. ما انت خسرانة شي لو انتظرت شوي .. و في ذي الفترة ادعي ربك قايمة قاعدة نايمة بالتوفيق في حياتك ، ربي ما يعجزه شي سبحانه .. يبدل الحال إلى حال في غمضة عين ..


و فيه شغلة ثانية العلاج بالبداية ممكن يزود الأعراض فقط في أول شهر ثم تبدأ تزول تدريجيا لين ترتاحين بإذن الله لذلك لا تقلقين و لا تستعجلين اخذ اي قرار في ذي الفترة ..


أما بالنسبة لخوفك إنك تظلين وحيدة ، ما راح اقلك أن الرسول صلى الله عليه وسلم ازره عمه يوم اقلبوا عليه كل الخلايق و اذوه ثم ربي سخر له السيدة خديجة رضي الله عنها و أنجبت له الذرية رضوان الله عليهم و ما صار لوحده ..

و فيه كذلك قصة عاصرت أحداثها ، فيه وحدة من معارفنا تزوجت و في ليلة عرسها ظهرت ماشاء الله تبارك الله في غاية الجمال و الجاذبية لدرجة النساء ما انفكوا من التعجب و الحديث عن طلتها ، و أكيد فيه منهن لم تذكر الله للأسف ، و مجرد ما وصلت بيت زوجها الا تصيبها حالة من الهياج ما تبي تجلس ببيت زوجها و لا تبيه يقرب منها و تصرخ لدرجة إنها تفتح باب الشارع و تهرب ثم جابوا لها الرقاة ثم ودوها للعلاج النفسي قالوا فصام شديد و صار زوجها يتردد عليها ببيت أهلها و حالتها ما استقرت و هو عايش بمنطقة أخرى بحكم عمله يبي ياخذها معه مو قادر بسبب حالتها لين بعد فترة يوم درا إنها حامل بدال ما يقف جنبها تخلى عنها تماما و هذا وجه الضيف ،

جلست مع امها و ابوها يرعونها و يصرفون عليها و يراجعون بها لين أنجبت طفلها اللي ما شاف ابوه و لا صرف عليه ريال .،

بعدها مع الأدوية زاد وزنها لدرجة فظيعة حتى صارت تمشي بعكاز ثم يا لطيف على كرسي متحرك الظاهر من الأدوية سببت لها سمنة و هشاشة شديدة في العظام لين كم سنة و توفوا امها و ابوها و ولدها ما كمل عشرة سنين ،

المشكلة ان حتى اخوانها و أخواتها اللي اكبر منها كل منهم في ديرة ، ما عندها بعد الله الا ولدها ،. لكن سبحان الله ماشاء الله تبارك الله كأنه رجل بعقله و تدبيره ، صار يقوم بأمه من كل النواحي لين كبر و توظف و هي معه و الحمد لله.

اذكر يوم دروا امها و ابوها مع حالتها ذيك انها حامل اغتموا غاية الغم لدرجة الأم تبكي و هي تقول بنتي حامل لأنها بدال المصيبة مصيبتين و فوق ذا و ذا تركها الزوج و هرب.،.

و شوفي سبحان الله الوالدين الله يرحمهم راحوا و بقى الابن الله يحفظه يرعاها .

لذلك ربي ما يترك أحد سبحانه ، هذي القصة و قصة ثانية عن تسخير الحيوان للحيوان ابسردها لاحقا بإذن الله تعالى