أمنيه

بيانات اضافيه [ + ]

رقم العضوية : 8333  تاريخ التسجيل :  04 2005  أخر زيارة : 24-08-2007 (03:15 AM)  المشاركات : 1 [ + ]  التقييم :  10

لوني المفضل : Cadetblue

عندي مشكله

السلام عليكم ورحمة الله وبركاته
اولاً : انا قصدت منتداكم بسبب اني تعبت من حالتي
ثانياً : انا تمشيت شوي في قسم مشاكل الكبار لقيت فيه مواضيع مهمله ولم يتم الألتفات لها ربما لأنشغال المشرفين والدكاتره اللي هنا وربما لم ينتبهوا لوجودها وكل إنسان وله عذره
انا اتمنى ان احد يشوف مشكلتي واتمنى اني اجد حل لكن اذا اهملت عادي اهم شي اني فضفضت شوي عن نفسي
ماادري من وين أبدأ مشكلتي
انا عمري 19 سنه واجهتني مشكله صار لها الحين تقريباً سنتين معي
مشكلتي هي الخوف
اخاف وانا نايمه ولما احد يصحيني من النوم أشهق وأفتح عيوني بطريقه تخلي اللي مصحيني يظن ان عيوني بتطلع
ولما اقوم من النوم اقوم وانا ارتجف
واحس بخوف رهيييييييب وقلبي يدق بقووه ليه ماادري
اذا صحيت من النوم لحالي احس بخوف على طول احاول اكلم اختي اللي معي بالغرفه
وعشان اني ماابيها تحس اني خايفه أسألها كم الساعه ؟
اظل على السرير الى ان اهدا واقوم اطلع من الغرفه
مشكلتي اذا انتبهت نص الليل احس بخوف يمنعني من اني اقدر ارجع انام
اذا بغيت اولع اللمبه افتح الجوال ينور لي طريقي مع اني عارفه طريقي بس من خوفي لازم افتح الجوال ينور لي طريقي الين اوصل لمفتاح اللمبه واولعها
ومن اول مابدت معي المشكله بدا وزني ينقص
إلى الآن نقصت 11 كيلو ودايم اهلي يقولون لي انتِ طويله لازم ترجعين وزنك مثل اول احاول بس مااقدر ( وزني قبل كان 61 وطولي 167 )
واذا انفتحت شهيتي مررررره ازيد كيلو بس بسرعه افقده مااقدر احافظ عليه ماادري ليه
وانا بطبعي اجتماعيه لما اروح الكليه او مركز صيفي او اي مكان ممكن اختلط فيه مع الناس اقدر اكتسب صداقات بسرعه واخذ ارقام تلفونهم واتصل عليهم لكن تمر علي لحظات احس اني مااستاهل هالقلوب الطيبه وهالبنات ذول انا مااستاهل صداقتهم
كثير ادخل في حالات بكاء شديد كانه ميت عندي احد
اخاف اني اغلط على وحده وتكرهني وانا مااحب احد يحقد علي ويكرهني اخاف من اللحظات اللي لما امزح معهم على طول اعتذر حتى لو ماكانت هي تزعل
صديقتي تقول لي انتِ فيك عين لأنها تؤمن بالمس والسحر والعين كثير
انا اقول العين حق لكني ماأؤمن ابها واقول لا مو عين
لما أتأخر بالنوم اصحى اتوقع امي بتهاوشني ليه تأخرت بالنوم لكني لما اروح لها واسلم عليها الاقيها اول ماتشوفني تعدل جلستها وتبتسم وتهلي وترحب فيني وتدعولي لاني انا يومين احب راسها بس مدري ليه احس انها بتهاوشني
لما أسمع صوت مثلاً شي طاح على الأرض بقوه اتوقع انه احد طاح مغمى عليه ويطيح قلبي اروح ركض دايم الاقيه صحن طايح او كرسي او شي مايستحق الخوف كله
ولما اسمع صرخه او صوت عالي اتوقع صار مكروه لأهلي اروح ركض اشوف وش فيهم بس الاقيهم يضحكون
لما اسمع صو ابوي يرتفع حتى لو ضحك او عطاس اتوقع انه يتهاوش مع امي
في اكثر حالاتي اجابيه واقدر اتغلب على الخوف ماتستمر طويل يعني ان كثرت يوم يومين بالكثير وفي هاليومين مااقدر اتخلص من الرعب اللي يصيبني وانا نايمه
في حالاتي الأجابيه احس اني ابي أأكل ولو ان معدتي مليانه
ولما ارجع لحالتي الطبيعيه احس بمعدتي تعورني موت من المجوع بس نفسي منسده ولما اروح اجبر نفسي على الأكل احس طعم الأكل متغير وصاير سئ
هذي المشكله حقتي ماهي متعبتني كثير بالأصح تأقلمت وتعودت عليها حتى اهلي تعودوا علي كذا لكن احس ان سنتين بهذي الحاله كثير
اقول لأمي توديني مستشفى نفساني ترفض تقول انتِ مو خبله عشان اوديك
اقول لها مشكلتي مااحد يقدر يحلها غير هم لكنها ترفض لانها للحين تظن ان المستشفى النفسي للمجانين فقط

هذا كل اللي ابي اقوله
والسلام ختام

المصدر: نفساني