نفساني - عرض مشاركة واحدة

12-05-2022, 05:57 PM

هذي رسالة لوالد صلاح نشرها في النت :

بسم الله الرحمن الرحيم
والصلاة والسلام على رسول الله وعلى اله وصحبه اجمعين .. وبعد..
السلام عليكم ورحمة الله وبركاته
حاولت ارسال المقاله التاليه بعد نهاية ايام العزاء لكل الاسماء الموجوده في جوال المغفور له باذن الله ابني صلاح ولم اتمكن من ذالك بسبب عطل في الشريحه والجهاز معا وعدم مقدرتنا لحل المشكله حتى الان. وقد تكون خيره من الله عز وجل لي ولكم. ولهذا قررت ان انشرها عن طريق الموقع لتصل لكل معارف ومحبي صلاح.

قال صلى الله عليه وسلم (مَنْ لمْ يشْكُر النَّاسَ لَمْ يشْكُر الله )
ان كان الشكر واجب للاعتراف بالفضل فالشكر والحمد لله الذي من علي بكل شي وقصرت معه في كل شي ولكنه اهل التقوى والمغفره ثم الشكر لكل من شاركنا مصابنا وعزائنا في ابننا سواء بالحضور او بالاتصال فلقد كنتم نعم الاخوان والاعوان. اسال الله ان يوفقني لمشاركتكم افراحكم وان يجنبنا الاحزان ويرزقنا الصبر الجميل عند النوازل وان يرحم امواتنا وامواتكم واموات المسلمين والحمد لله رب العالمين.
العذر من الاخوه الذين لم اتمكن من الرد على اتصالاتهم.

تعليقي على رسالة صلاح الله يرحمه
ما كان عندي خبر عن رسالته الا اول يوم في عزائه عندما اتصل بي احد المشايخ يعزيني ويقول ولدك باذن الله في خير وذالك من خلال قرأته رسالة صلاح المرسله له من قبل احد اصدقائه حيث طلب مني الشيخ الاذن لبناء موقع خاص باسم المرحوم ونشر الرساله للعبره فما كان مني الا ان طلبت منه الاذن للاتصال مره اخرى لوضع سماعة الجوال على العالي ليسمعوه الحضور من افراد العائله وذالك بسبب عدم التركيز لدي. وافقت على بناء الموقع ونشر الرساله بتاييد الحضور فشكرا جزيلا للشيخ ومن معه في تبنيهم الموقع وجعله الله في موازين حسناتهم.

خاطرة
بعد اسبوع فتحت الموقع وذهلت بما كتبه صلاح في رسالته كيف كان على ذالك الحال وما عندنا خبر؟ ما كان يبين عليه. كان يدخل علينا بوجه بشوش يضحك مع هذا ويصيح على هذا وبمزح مع اخر من افراد العائله وكذا وكذا والكثير من الذكريات الحلوه وفوق ذالك ماهو راضي عن نفسه بما كان يسوي مع اهله. نعم.. صدق فيما قال ان نفسيته متكدره اثناء تعامله معانا بعض الاوقات وكنت احاول استدراجه لمعرفة وش اللي فيه ولكن يبتسم لي ويقول لا ما فيني شي. حاولت منه تغيير لوحة السياره نكد يضحك مني ويقول وش المشكله ان بقيت اوغيرت .. انشاء الله فال خير. حاولت ازوجه يحدث ما يحول دون الزواج. اخر مره قبل سفرته بشهر كانت نفسيته متكدره بشكل غير طبيعي وانا وياه نتناقش عشان موضوع الزواج قلي وهو مصر انه ما رايح يتزوج الا بعد شراء مسكن قلت له متى قال قريب ان شاء الله لان اسمي نزل في الشركه وجالس ادور بيت. طلبت منه ياخذ اجازه ويظهر خارج البلاد يشوف العالم ويغير جو وعلما لبى طلبي وجاء بعد اسبوعين ومعه التذاكر والحجوزات وطلب مني اذا فيه مجال لو سافرت معاه فقلت ان شاء الله في المستقبل اذا الله اعطانا وياه عمر.
فسبحان الله وش اللي كان فيه.. وش اللي يكدر نفسه بعض الاوقات..وش اللي في خاطره ووده يسويه ومو قادر اكثر من بشاشته وحنانه وطاعته لنا.
من ذكريات صلاح رحمه الله
كان اذا جانا من الشرقيه من وردية اخر ليل يدخل علينا بدون علمنا في الوقت اللي احنا قد صحينا من النوم يسلم علي ومن ثم يسلم على امه واخوته ويرجع لي يعطيني وياخذ مني اهم الاخبار اللي تهم العائله. وفي بعض الاوقات كان يسالني اذا كان فيه مجال او سبب لجمع القرابه لكي يشوفهم ويجلس معهم جميعا.
كان يروح البقاله يحضر اغراض الحلى ويطلع لغرفته يتسبح ويلبس احسن الثياب وينزل عند امه واخواته في المطبخ لتجهيز وعمل الحلاويات اقله ليش لابس هالكشخه وانت في هذا المكان يقول لي كذا زين عشان يظهر الحلي الذ ومقبول.
وفي الليل يروح لزملأه ويتصل وهو راجع للبيت وش احسن أكل نفسكم تاكلون الليله: نقله ما يحتاج- بنتعشى بالبيت او من مكان قريب. يدللنا بمطعم ماما نوره يجيب معه كيس مليان شاورمه لنتعشى ولقد كان مطمعه المفضل.
واحيانا من مطعم صيني او تركي او حمص وفول ابو زكي واوقات وجبه ساخنه من ماكدونالدز او برجركنق.

اليوم اللي وصل فيه من سفرته لبعض من دول اوروبا طلع لنا انا واحد من اعمامه كيس مليان بالشوكلاته احضرها معه من الشركه الام من سويسرا وقال: اذا حملت الصور بالجهاز اباوريكم شكل المصنع وان شاء الله اخذكم معي يالشيبان في سفرتي الثانيه. كان ينقي لنا الشوكلاته المغلفه باللون الازرق يستهبل علينا وحنا عارفين انه يحب اللون الازرق.
اتدرون اني ما ادري انه كان يوصي اخوانه بالحرص علي انا وامه الا بعد ما مات الله يرحمه وذالك عن طريق احد اخوانه
وعندي الكثير الكثير من الذكريات الجميله مع صلاح الله يرحمه و يجمعنا به ووالدينا والمسلمين في جنات النعيم

ظل امرأة معجب بهذا