نفساني - عرض مشاركة واحدة - قصة نجاح في التخلص من الأدوية النفسية (الأعراض الانسحابية)

22-07-2021, 09:35 PM

الله يحييك اخوي متعافي حاضر بقول كل اللي عشته بحاذفيره

بشهر 2 هالسنه عزمت اني اخلي هالسم رحت للصيدلاني وسالته شلون الطريقه قالي بالتدريج انا سمعت هالكلمه ورحت شسويت

اول اسبوع خليتها حبه يوم وترك والجرعه 20
واسبوع اللي بعده حبه يومين ترك وبجرعة 20
واللي بعده حبه كل ثلاث ايام ترك والجرعه 20

لاحظو ان الجرعه ثابته 20 وهذا كان بداية العاصفه عندي

جتني حراره اخر شهر 2 حراره هدت حيلي بعمري ماجتني مثلها .. ادخل المستشفى دربات واطلع قالو يمكن كورونا ثلاث مسحات بايام متفرقه وكلها سلبيه
تحاليل سليمه لكن ثاني اسبوع ارتفع السكر عندي وانا مو مريضة سكر سو لو تجسسي طلع طبيعي قالي الدكتور يمكن عارض ويروح

ثالث اسبوع ماقدر امشي من ثقل ثقل مو طبيعي بين اكتافي وظهري
ولا اتوازن بالمشي
دوخه ودواااااااار موش طبيعي
الاكل ابدا ابدا مافيه شهيه

يقولون لي في ارتفاع بالكريات الدم البيضا مو عارفين شنو السبب

تخيلو شنو يطري في بالكم من تحاليل تخطيط ايكو كلها سويتها النتايح سليمه

وفوق هذا احس اني مو مع الناس ولا اهلي خفت من غرفتي وبس ابي اقعد عند اهلي كأني في عالم ثاني وخوف وارتباك ومحاتاه من غير سبب وسواس والله ابكي واطلب ربي اني يشفيني واعرف علتي

ليش ماجا في عقلي اللي اعيشه من تركت هالحبوب
فعلا قريت بالنت اعراضي كلها من الترك الغلط لهذي الحبوب على طول رحت اكلها بشكل يومي بجرعتي المعتاده لله الحمد من قبل ومن بعد رد وضعي الطبيعي على دخول رمضان

وكان باقي في العلبه تقريبا قصديره ولما خلصتها
تخيلو دخلت على طول بجرعة 10 وبشكل يومي
يعني ماتدرجت 15 على على طول 10

وحاليا من بلشت هالجرعه من شهر 4 الى يومنا هذا وانا عليها

بس قريت هني البعض يقول من يقلل الجرعه من الاسبوع الثاني يحس باعراض انسحابيه انا لله الحمد ماحسيت في هالشي رغم اني قللت رقم كبير
بس لاحظت اسبوع واحد من اول شهر 7 في أرق قلة نوم فقد شهيه شوي ارتباك وخوف عصبيه بكن احاول اني اسوي كنترول على نفسي لكن ابدا ماطولت .. هني عرفت المنتدى وتجاربكم وساعدني وزادني ثقه ويقين اني مو بس انا مريت في هالشي و انها ايام وتعدي وفعلا هذا الحاصل ..

كل ماخاطبت العقل الباطني في هالشي كل ماستجابت افعالك في هالامر .. وكل ما فتحت صدرك للاعراض وقلت تعالي .. مخك يقول هذا مو (خايف ) ويهون عن مهاجمتك وتجيك اشياء خفايف خفايف

والاهم اني ماركز على نفسي اليوم شنو مريت فيه والا شنو احس فيه عايشه يومي طبيعي .. لاني اشوف الاغلبيه هني حيل مركز مع نفسه وهذا غلط غلط والله بدخل الشهر الخامس ولا حسيت باعراض انسحابيه قويه مثل ماتقولون ولاحظو اني قفزت قفزه قويه بالجرعه من 20 الى 10 كل ماجيت بقوه وتحدي كل ماكانت الاثار اقل انت طبيب نفسك

ولا انسى الروتين عندي ساعدني جدا جدا هو

كثرت ماي وهالشي عندي من زمان
اكل فواكه
مشي ثلاث ايام بالاسبوع موش منتظمه على طول
سورة البقره بشكل يومي ومن عمري على هذا الطبع لله الحمد والمنه .
الاذكار لله الحمد صباحا مساءا
اقعد كثر ماقدر مع اهلي
اخيرا الاتكال على الله تعالى بيقين وثقه

واي اساله اخواني خواتي حاضر من عيوني
وشكرا لاخوي المتعافي على هالموضوع اللي متاكده ساعدني وساعد ناس واجد تاخذ هالسموم وهي ابدا ابدا ماتحتاجه .. طبعا بعيدا عن الناس الي حالتهم صعبه ويحتاجون هذا النوع من العلاج