نفساني - عرض مشاركة واحدة - قصة نجاح في التخلص من الأدوية النفسية (الأعراض الانسحابية)

13-08-2021, 07:53 PM

اخوي وحيد صالح بعيد عن الفلسفه والتعمق بالروح والجسد والرابط بينهم الخ باختصار السالفه ان الأدوية النفسيه لها اعراض انسحابيه شديدة وعلى المدى الطويل الطويييل بمعنى الكلمه رضي من رضي وابى من ابى وهذي قناعه اخذتها من تجارب الآلاف من المرضى حول العالم والدكتور سواء اجنبي عيونه خضر ولاعربي ماتهمني شهادته ولو كان ختى بروفسور لاني رحت لهذا وهذا وكلهم نفس الشي الي يهمني التجربه ..والعلم اصلا كله قائم على اساس التجربه والخطأ لذلك لو قال لي الدكتور كلام ورأيت عكسه في تجارب ناس كثيرين راح اصدق الناس ولاعلي من الدكتور لانه بشر يخطئ ويصيب وماهو معنى اني انا ماني دكتور فأنا عبيط وجاهل واسلم الطبيب النفسي الخيط والمخيط واقوله العب فيني سو الي تبي بس مابغى اكتئاب ولاقلق !

يا اخي انا اكتب في قوقل عن خطورة الادويه النفسيه يطلع لي مقابلات تلفزيونيه مع الرعاع والدهماء العرب المسمين اطباء نفسيين وهم عباره عن صيادله يصرفون العلاج ولايشخصون المرض ودراستهم في جامعات عربيه خرطي .. يا اخي اثنين من ربعي يقدرون يفتحون عيادات نفسيه تدري ليه؟ فقط لانه تخرج من قسم علم النفس من جامعه الامام وانا اعرفهم ماحولك احد ..
واغلب اطباءنا هنا نفس النظام خريجي جامعات ورق نظري وليست جامعات طبيه فيها معامل ومختبرات وتحاليل وتصوير مقطعي للدماغ و..الخ

تخيل قبل ١٥ سنه دكتور معروف كتب لي ريسبردال مضاد للذهان وانا اعاني من هلع بالله هذولا اطباء!!! والحمدلله ماستمريت عليه ولا كان علوم زد على ذلك ربما اني قطعته بدون تدرج بتوصيه من بروف حي الملز !!

الأمريكي يسوي تصوير مقطعي محوسب للمخ في اخس عيادة والجهاز في كل مكان عندهم وانا ١٥ سنه اتردد على هالعيادات ماحد سوا لي تحليل فيتامين دال !!
ادخل المنتدى وشوف بنفسك تبي تصدق ولا مانت مصدق هذا واقع ومجرب وانا بعد ١٥ سنه توي دريت ان بلاي من السيبرالكس والسيروكسات وطقته لعب في اعصابي ونفسيتي لعب وعلى فكره اقدر ازيد الجرعه من بكره الى ٢٠ واعيش بطل كم سنه قدام لكن وبعدين من يفكني منه ومن اعراضه علمني عطني ضمان والله لارفع الجرعه من بكره ولو تبي وصلتها ل٣٠ فوق الجرعه القصوى

الامثله كثير على ان الدواء النفسي يغير المخ وليس آمن من الناحيه النفسيه فيه من ياخذه لعلاج سرعه القذف وفيه الي ياخذه لقرحه المعده وعقبها ماهم بخير واكبر مثال حي عندك كاتب الموضوع ماكان يعاني من اي شي ولعب فيه السيبرالكس سنوات ولأن ضميره حي كتب هالموضوع الي لولا الله ثم هو لكنت الان اتردد مره اخرى على العيادات النفسيه فالله يجزاه عنا خير