نفساني - عرض مشاركة واحدة

09-12-2024, 01:07 AM

ضايق صدري ما جاني نوم افكر في قط ضعيف أعمى وقف على مدخل بيتنا اليوم العصر و انا اضع الطعام الجاف لقطط الشارع في المدخل

ضعيف كان خايف يتراجف انهروه القطط ثم انطلق يجري و اختفى حتى ما مداه يحط فمه في الصحن

و انا أجري داخل ألقط عباتي و أتبعه دورت عليه ما حصلته

مدري ليش حسيت انه ما جاء من نفسه ، أحد وضعه على بابنا يوم شاف الطعام الجاف اللي يوضع أمامه يوميا ، ما يدري ان القطط ما تعيش في قطيع كحال باقي السنوريات ، ما غير يطردون بعضهم ، اهم شي عندهم بسط النفوذ و السيطرة على المكان ، لذلك قطع قلبي أكثر اخاف تدعسه السيارات ، و من وقتها و أنا أشعر بالذنب و قلبي يعصرني عليه .. لان العميان فرصة نجاتهم ضعيفة في الشوارع اللي تغلي على صفيح السيارات الساخن

و المشكلة الأكبر انه يشبه لقطي الأعمى اللي فقدته قبل ثلاث سنوات و نص ، لكن الفرق ان قطي المفقود فيه علامة في وجهه . لكن سبحان الله نفس اللون و النوع لدرجة اعتقدت انه هو لأول وهلة

أخ يا القهر ليته ما جاء و لا شفته .. مدري وش صار عليه .. قعدت أدعي أنه بالفعل احد جابه ثم تراجع و أخذه لانه اختفى اختفاء تام من امام بيتنا ، ماهو معقول قط أعمى يختفي بذي السرعة الا لو احد أخذه

يارب نجي كل الضعوف من خلقك

الجنة مهرها غال ، ما كلن يقدر عليه .. و ما أظن هناك أكبر مهر من اغاثة ملهوف ، كيف لو كان الملهوف هذا من العجماوات اللي لا تنطق و لا تعقل ؟

أشغلني قعدت ارابط لين اظلمت الدنيا ، اقول يمكن يرجع و ما رجع ..

يارب استودعناك كل الضعوف من البشر و الحيوانات فاحفظهم بما تحفظ به عبادك الصالحين ..