نفساني - عرض مشاركة واحدة

28-03-2025, 05:06 AM

السلام عليكم ورحمة الله وبركاته

اشكركم اخواني على نصايحكم الثمينة و دعواتكم

يارب يجعل لكم منها اوفر الحظ و النصيب و يتقبلها

بالنسبة للرقاة.. مدري ليش ما أثق فيهم

يمكن عشان مريت بتجارب سيئة يوم كان عمري ١٧ و داهمني الوسواس ، امي الوحيدة اللي كانت مع علاجي في الطب النفسي و رحت بالفعل و اعطوني العلاج ، بينما جدتي رحمها الله ( والدة امي ) رفضت و كانت تتجول بي عند الرقاة ، كل ما سمعت عن راقي في مدن المملكة ودتني له ، لين واحد منهم خنقني و طحت على جنبي و قامت جدتي تصرخ ، الدلخ يعتقد ان فيه جني يخنقه و هو قاعد يخنقني

و كل ما اتذكر الادهان بالزيوت ، كانت جدتي الله يرحمها تمرخني من راسي لاقدامي صبح و ليل ، حتى المدرسة كنت اغيب عنها ..

ايام الله لا يعيدها

لذلك ما ودي تتكرر

لا يمكن اثق في راقي . ربي يسامحني مع ان ادري ان فيهم اللي فعلا يخاف ربه لكني وش أسوي ، من قرادة حظي لا يمكن اطيح في الصاحي

لا أقارب صاحيين لا جيران صاحيين
مافي احد صاحي

اتعبوني الناس الله ياخذهم

قصدي ياخذ الشرير فيهم

الظاهر يبي ياخذهم كلهم ما يبقى الا واحد أو اثنين

كأني طولت

بس من جد مكروبة

اول مرة احس بهذا الكرب و الضيق و الاختناق

العادة قلق شديد خوف وسواس

لكن كلها تجتمع مع ذا الكرب و الاختناق

الحين صدقت المكتئبين يوم يقولون نتمنى الموت

ربي الشاهد لي كذا يوم اتمنى الموت ، روحي بتطلع حرفيا ، ضلوعي منطبقة ، ما اشوف قدامي الا الموت و أبغاه بشدة اليوم قبل بكرة

قبل الايام هذي يوم كنت اقلق و اخاف و اوسوس ابغى أطيب و عندي امل اني أطيب

الحين استغفر الله العظيم بس ابي اموت

ما اتخيل راح يستمر هذا الشعور

استغفر الله العظيم عندي اكوي نفسي اروح للحرمة اللي تكوي اهون من اني اروح راقي

من ثاني يوم برمضان الماضي صليت الفجر مافيني الا العافية ما يمديني اغمض الا اصحى على كابوس و ذاك يوم و هذا يوم اختلفت كليا ، داهمني الوسواس أعوذ بالله بصورة ملازمة و اختلفت شخصيتي و نظرتي تماما

حتى اخوي مريض الفصام ، له يعاني من الفصام المقاوم عشرين سنة . و من سنة انتكس و زادت عليه الأعراض ، و الأسبوع الماضي زودوا له جرعة علاجه

حالي و حاله مع بعض تغير من سنة

الوالدة تقول هذا سحر مجدد

قلت لها وش يجيبه السحر و احنا اصلا ما نعتب عتبة الباب و لا احد يشوفنا

ما في احد له مصلحة يسحرنا

من كثر عدم تعاملنا مع احد ، الخلايق تفكر ان مافي احد ساكن ببيتنا

حياة متوقفة و الحمدلله على كل حال