كثر الحكي والهرج لاشك ننفاه=لاصار في بعض الرجال المناعير
لاجاك نمام فحذرى تلقاه =مكروه عند الناس من يومه صغير
متشبع بالخبث ساسه ومجناه=يشذب عروض الناس شذب المناشير
هماز نماز خبيث بممشاه=كم واحد من برفقته مالقى خير
من هرجته درب المشاكل عرفناه=ينقل كلام فيه كذب وتزوير
لو نعرف اهدافه حشى ماسمعناه=يعطيك علم وينقل العلم للغير
يرتاح الى جت له على ماتمناه=خبيث طبع يدور الشر تدوير
المجلس اللي فيه لاجله تركناه=نمشي ولو طالت علينا المشاوير
نمشي لرجل حاش طيبه بيمناه=رجل كريم ولايحسب المخاسير
القصر ظله حدده رفع مبناه=والقصد واضح مايبي له تفاسير
نسمع تراحيبه بنا لاوصلنا=في مجلس مفتوح لاجل المسايير
رجل الى منا نخيناه نلقاه=نلقاه في وقت الليالي المعاسير
نرتاح الىمنا حضرنا وشفناه =حق الضيافه قام به دون تقصير
جنسه ليا منا فقدناه زرناه=له عندنا جاه ومعزه وتقدير
وان زاد حمله عنه حنا نقلناه=نقضي لزوم اهل الوجيه المسافير
مانهرج بشي طلبه وعطيناه=العلم مايطلع ومحفوض في بير
رايه سديد لابغينا استشرناه=له هيبة مع منطق وتعبير
تمت وصلو عد برق لمحناه=على نبي جالنا بالتباشير