|
الزوجة الأجنبية ..باللهجة الكويتية
الزوجة الأجنبية !!
معروف ان الزواج قسمة ونصيب ، مقولة مشهورة ومحفوظة عن ظهر قلب للقاصي والداني ، ولكن رب العباد رزقنا بعقل لازم عشان أنفكر فيه ونوزن الأمور ومن هذه الأمور اختيار شريك الحياة أستغرب من الرجال اللي يدورون زوجه من غير جنسيتهم ، خاصه لما يختارها من أقليم وبيئة مختلفه عن بيئته ، اللهجة غير والعادات غير والتقاليد غير ، ياخذ بنت الناس ويقعدها في ديرته فتحس بالغربه واذا كان فيه دناوة نفس يعايرها بجنسيتها او بعادات بلدها حتى بنظام الحكم في بلدها ما يسلم من لسانه ، اما اذا كانت من النوع المتسلط وقدرت تحط الحبل برقبته فهني يوليه يا سواد ليله ، لأنه لازم يسفرها مرتين بالسنة على الاقل ويكون محمل بكل ما غلى ثمنه وخف وزنه او ثقل من الهدايا للماما والبابا وللعم وللعمه وللخال والخاله والى كل ما يمت بصلة الى الزوجه المصون وعليك الحساب . أما الطامة الكبرى اذا كانت الزوجة من جنسية أجنبية مو عربية وخاصه اذا كانت من الدول العظمى أمريكية أو بريطانية أو ألمانية أو فرنسية ( يعني من اللي عملتهم باليورو )عاد هذي ما تقدر تقولها ثلث الثلاثة كم يا ويلك والله تحتل ديرتك بكبرها ، واذا ازعلت مسكت اليهال وسحبتهم ديرتها وتعال هني دبر عمرك ، باجر تلقى بنتك تدير صالة قمار حشاكم و ولدك صاير عراب لعصابة أو رئيس فرقة موسيقية حاشر نفسه بدلاغ وقاعد يغني بملهى .
صدقوني ما يحك ظهيرك الا ظفيرك ، ماكو على بنت ديرتك لما تقول الآه تلقاها تأوهت قبلك ، واذا شافتك تعبان كلمة " حبيبي بو عيالي " تسوى الدنيا ومافيها ، ولا تقولون تبالغ...أسألوا أخوي المطيري اللي أبزوره بعد أسبوعين ويبي يوديني للقهوة الشعبية ..
وكذلك أسألوا غيري وراح يقولون لكم نفس الكلام >>
أبو مروان
سعودي الجنسية ..
من ذوي السحنة الخليجية ..
سمعتي يا واهمة ..
|