|
تعبني معاه وبثقله الزايد!!
السلام عليكم
اتمنى احد يساعدني من الاطباء الافاضل الموجودين هنا..
مشكلتي هي مع خطيبي..انا عمري 20 وهو حوالي ال27 سنه..لنا مخطوبين سنتين لظروف دراستي وعمله والين مايكون نفسه ولاحبينا يكون ملكه على شان مااحد يشغل الثاني..
المهم انه مايقصر يجي بيتنا كل اسبوعين طول هالسنتين ويسلم على ابوي وفي كل مناسبه يجيب لي معه هديه..وهو ماشافني الا يوم الشوفه الشرعيه مع انه ماطلب يشوفني وكان يقول المهم هي اللي تشوفني وتوافق على!!! مع انه اهلي دايما يقولوا لي سلمي على خطيبك وكلميه مافيها شئ وانا كنت امانع على اساس انه طول فترة خطوبتنا ماكان حتى يذكر اسمي قدام اهلي..مع انهم دايما يجيبون له طاري عني وهو كان يكتفي باابتسامه او بتعليق بسيط مثل_الله يستر عليها,الله يسعدها_ومن هالكلام.
مر احد الاعياد ولاحتى قال لاهلي قولوا لها كل عام وانتي بخير وهذا الشئ كثير ضايقني..انا بعمري ماتعودت الاهمال من احد.. ولما لاحظت على امي الشئ هذا في العيد اللي بعده قالت لابوي وقال ان عادي لو كلمها وكلمته مافيها شئ خاصة ان فيه امور كثير المفروض يتفقون عليها ويمكن هو منحرج يكلمها والاياخذ رقمها مني.. وعطاه ابوي رقمي مادام فيه فرصة عيد على اساس انه يكلمني..انتظرت مكالمته اول يوم ثاني يوم ثالث يوم ولااتصل وكل يوم عن يوم نفسيتي تتعب بزياده..المهم في اليوم الرابع تفضل على واتكرم واتصل على وكانت رنه يتيمه وكنت وقتها اصلي ومن عقبها مااتصل !! تعبت نفسيتي بزياده وغيرت جوالي وانا اقنع نفسي ان هو الخسران..
المشكله كل شئ يدل على انه يحبني ومتمسك فيني ويبيني لدرجة انه وافق يكمل دراسته مع انه موظف وعنده دواميين..وفي احد الايام اتصل على جوال امي يسلم عليها وقالت له امي كلم خطيبتك..وكلمته.. الغريب انه طول المكالمه كان يتغزل فيني ويقول لي كلام يحرجني مع علمه بوجود امي وخواتي في ذاك الوقت..وقال لي:اني دايم على باله ويتخيلني دايم بااحلى صوره ويتوقع مني كل شئ طيب ويتمنى لو تجمعني الايام وياه ويحقق كل امانينا سوى..وكان يقول لي انه مستحي مني مع انه كلامه مايدل على كذا!!وانه مستحي مني اكثر في ان كيف انه اهلي هم اللي دايما يحاولون يقربوننا لبعض وانه هو الرجال اللي المفروض يتقرب لي ويوصل لي من غير واسطه..وطول المكالمه كان يبين لي فرحته بسماع صوتي وانه يتصبب عرق ومنحرج وانه كان ينتظر هاللحظه من زمان.. مع انه كان عنده رقمي القديم وغيرته بسبة تطنيشه لي..وفي اخر المكالمه وعدني انه يتواصل معي دايم بالمكالمات والرسائل الكثيره على جوالي واللحين مر اسبوع ولاشفت ولارساله ولامكالمه ولاشئ..المشكله ماني قادره اصبر وانا بطبعي خلقي ضيق و احس اني محرومه نعمة الصبر..وماني قادره مااطنش عن هالموضوع ليش يوعدني ولااشوف شئ عندي لو ماوعدني كان ارحم على!!..
المشكله اخاف ارسل له رساله ويشوف نفسه زود على..هو يبغاني انا اللي ابدأ بكل شئ..واتوقع انه هو الرجال وهو المفروض اللي يبدأ باي خطوه لقدام واتوقع لو اغيب عنه بعد ماراح يسأل عني وبيبقى على تطنيشه!!!..ماادري وش قصده باللي يسويه معي وكيف يقول لي من زمان وده يوصل لي وهو اللحين بيده كل شئ ولاشفت منه شئ؟؟هل هو فعلا يستحي مثل ماقال؟ولو اني مااتوقع لانه انسان شخصيته قويه..والا يبغاني ابدأ معه بكل شئ..وملكتي قريبه اللحين وخايفه ان يكون هو نفسه الانسان الثقيل المطنش اللي اعرفه لان عندي افسخ الخطبه ارحم مااملك ويقولوا مطلقه بعد الملكه..وساعات اقول يمكن يتغير على الملكه..انا محتاره ماادري بالضبط هو من ايش خايف؟؟؟مع انه اهلي معطينه الامان وانا نفس الشئ يوم كلمني ماصديته ولازعلته بكلمه بس كان يردد طول المكالمه انه مايبي يحرجني..انا صدق كنت منحرجه يوم كلمته بس انبسط بسماع صوته وسؤاله عني...
وفيه شئ ودي اضيفه وماادري لو له علاقه او لا واتمنى ربي يخيب ظني في هالشئ..يقولون فاقد الشئ لايعطيه..وهو انسان عاش عند حرمة ابوه بسبة طلاق امه من ابوه من يوم كان صغير وماله غير اخت وحده من امه وكان دايم يقول انها كانت تضربهم وتزعلهم ومن هالكلام بس يرجع ويقول ماقصرت ربتنا مع عيالها ومن هالكلام..كنت احس بكلامه حزن وانه فاقد حنان..عكسي انا ولله الحمد اهلي مدلعيني بكل شئ..وانا خايفه انه يكون محروم من حنان الام وعطفها واخاف يكون تعبان من هالشئ او انه يكون تعود خاصة انه كون نفسه بنفسه ولااعتمد على احد وهو اللحين يساعد ابوه بااخوانه اللي من ابوه في تربيتهم ومصروفهم..
احس الامور متشابكه وانا ماعاد فيني اصبررررررررررررر مااحب احد يطنشني ولااحب ابادله بتطنيش وبنظري ايش حياتنا لو هو بيثقل وانا بثقل؟؟!! مع انه خير علاج للثقل هو التطنيش وانا مااستبعد منه انه يتعود على اني اكون الباديه بكل شئ...........حاولت اكتب بالتفصيل لعل وعسى اجد لديكم الحل اتمنى مساعدتي وعدم اهمال مشكلتي اللي يمكن بنظركم صغيره بس بنظري متعبتني وبتموتني وكل يوم ابكي بسبة هالشئ..والله يعين
|