نفساني - عرض مشاركة واحدة - تعب وظيم وقهر ودمعه عين تنحدر (ساعدوني تكفون ماني قادره أعيش )

25-07-2005, 05:28 PM

السلام عليكم ورحمة الله وبركاته

ألف ألف شكر لك ياأستاذي على ردك وربي كنت محتاجه لأحد مختص يرد علي وجعله الله في ميزان حسناتك وأثابك الله على تفريج همي وهموم غيري ..

أستاذي ممكن أشاركك في بعض ماقلت :

أنت قلت أني أفكر .. فعلاًأنا من النوع أللي أفكر بأي شي وأدقق بعد ..

الطلاق برأيي هو درئ لمشكله مستقبليه لأن الرجل لايناسبني أبداً .. وأنت تعرف مجتمعنايفرض جلوس المرأه مع الرجل حتى لو ماتبيه أهم شي هويبيها ويمل منها ويرميها في بيت أهلا بعدين (هذا واقع دائماً أشوفه )
وأنابرأيي أحزن هالحين ولا أحزن بكرا إذا صار معي أطفال ومسئوليه تفرض علي البقاء معه ..

بالنسبه لنظرة الناس أنت صادق الناس كلامهم مايرحم من تجريح إلى كذب إلى نميمه وأنامايهمني كلامهم قد مايهمني ليش هالعدائيه لي أنا وش سويت لهم بس ؟ أناعفته وهم يعرفون الفرق بيني وبينه لا شكلياًولا دينياًولا شخصياً ولا أجتماعياً ولا ثقافياً ولا حتى فكرياً ويقولون أنه هو اللي عافني طبعاًهو ماقصر لأنه حاقد علي ليش عفته ومابغيته قال أناعفتها والبنات دايم يحاولون يسألوني ليش وليش ولايراعون مشاعري ..

بالنسبه للأنعزاليه أنا أخترتها لأنها شبه حل : لأني لو أجتمعت مع الناس راح يذكروني ويزيدون حزني وحفلاتنا وعروسنا أهل الرجل يكونون متواجدين وهم مايطيقوني وصدقني ياأستاذي أنا ماني من النوع المنافق أنا اللي ماأحبه أبتعد عنه وماأحب حتى أشوفه ودايم إّا رحت مع أهلي للأجتماعات أسمعهم يقولون هذي أللي عافت زوجها ترد عليها الثانيه وتقولها مغروره تبي كامل ..

التفكير ذابحني ماأقدر أغيره لأن وضعي أصلاًذابحني .. لا تقولي غيري من تفكيرك وربي ماأقدر وشلون أفكر وأنا بوسط وحوش صدقني حياتي صارت خوف بخوف قهر بقهر ..

أستاذي بقولك شي يمكن نسيته أهلي هم السبب بزواجي الفاشل ..

صدقني ماأحتاج أني أروح وأطلع لمناسباتهم لأن كل الأشخاص هناك ليس لديهم سوى النميمه والحش وحتى قذف المحصنات ..

فكرت أني أروح لأخصائيه نفسيه ولمن قلت لأمي قالت بسم الله عليك مافيك شي أنتي بس تتدلعين ويقرون علي وهي ماتدري عن داخلي لأني أكتم حزني كثير وأتحجج بأنشغالي أو تفكيري بالجامعه وبحوثها ..

حالتي أحسها تزداد سؤ بعد سؤ حتى وجهي ذبل وصداع شديد يصيبني عند تفكيري ووأحس دائماًبالغثيان والآم أسفل ظهري حتى عيوني أحس بعدم وضوح الرؤيا دائماً وعندما أشكي لأمي تقول لي نفس أوعين وتقرأ علي وتشربني مويه مقري عليها ..

رغم كل هذا مازال عندي أمل بالحياة وأدعوالله أن يرجعني كما كنت وكما عهدتني دنياي

أعيد شكري لك ياأستاذي وتقبل تحياتي

فمان الله