نفساني - عرض مشاركة واحدة - تعب وظيم وقهر ودمعه عين تنحدر (ساعدوني تكفون ماني قادره أعيش )

30-07-2005, 05:44 AM

السلام عليكم ورحمة الله وبركاته

مدري وشلون أشكرك على وقوفك معي ياأستاذي من جد أحس أن فيه أحد يحس بماأحسه وقادر على أنه يعرف بعض من اللي بداخلي من آلام وجروح ..

من بعد أذنك أبعلق على ماقلت في ردودك لي :

اذا كنتي ترا ان هناك عدائية من بعض الناس فحاولي معرفة الاسباب وعلاجها ، فقد يكون هناك فهم خاطي ، يفضل معرفتها والبحث عنها .

نقرتين لعرض الصورة في صفحة مستقلة

أستاذي وربي ماعمري حقدت على أحد أوجرحت أحد أو نميت أحد أنا بصريح العباره (بحالي) ومرحه مع اللي يعطيني كرم وموده ومحبوبه من مدرساتي بكل مراحل دراستي وحتى بالجامعه كل الدكاتره يعزوني ويذكروني بالخير .. صدقني يسوون لي أشياء ماتخطر على البال أذكر مره وأنا بعرس كنت لابسه كعب دقيق اللي زي المسمار وكان فستاني شيفون ناعم وحلفو علي بعض الحريم اللي يعزوني أني أرقص ويوم مشيت برقى المنصه وتط وحده رجلها بطريقي وتلخبطت وطحت وأنشق فستاني وكانو البنات كلهم بطاوله وحده متجمعات وهم من بنات أقاربي المقربين بعد فتره مسكتها وكنا لوحدنا بالمجلس وسألتها أنتي ليش تعامليني كذا قالت -أنتي ماتعجبيني-ودايم أنهان وكرامتي توصل للأرض وأقرر أني أبتعد عنهم بس القهر يوجع لاصار اللي يكرهك قريبك وكثير مواقف بس أكتفي بهالموقف اللي أعتبره بسيط وأقدر أقوله بهالمكان..

والله ياأستاذي أني ماأهنت طليقي بلعكس حتى وقت الزفه مررتها بسلام ومافشلته ويوم طلعنا من الزفه دقيت على أبوي يجي ياخذني لأن أمي كانت مشغوله مع الحريم والتصفيف حتى محد درى بأي شي غير أسرتي ولمن طلب مهره عطاه أبوي المهر وزود يعني ماخسر شي فــــــــــــــــليش يحقد علي هالحقد كله ويقول عني كلام غير منطقي أنت صادق ياأستاذي الناس مايرحمون حتى الميت وهو بقبره الله المستعان بس..

كيف أروح لحفلاتهم والمعازيم ماأحب أشوفهم؟؟؟صدقني ماأحب أشوف وجيهم حتى يضيق صدري إذا سلمو علي *لااااااا بعد يسلمون قدام الناس بس وعشان الناس ولا من داخلهم نار وحقد علي*حتى مره كانت أمراه كبيره بالسن تحبني تقولي والله يابني أني أحبك في الله وأعدتس وحده من بناتي وجلست جمبي وتسولف معي وتمدحني وتمدح أهلي مرت وحده من البنات وقالت وهي ماره * وافق شن طبقه *

طيب أنا شفت بحياتي أشياء كثيره تجرحني من طفولتي ويوم كبرت وقلت الحمدلله تقريباًبدت تبتسم لي الدنيا وجبت نسبه وأنقبلت بأحسن تخصص بالجامعه وكبرت وفهمت الدنيا رجعت فوق تحت وتخربطت بكل شي وتفرحو فيني أللي مايحبوني وتشمتو فيني وهم مايذكرون مني الا كل خير @ قمة الظيم @ واللي يخليهم يكرهوني أني من النوع اللي ماأرضا الإهانه أبداً على نفسي أو على أحد أفراد أسرتي ومايبوني أثبت وجودي سواءبشكل أو دراسه أو تفكير أو منطق أو حوار ..

صدقت ياأستاذي التفكير يلعب دور بصحة الأنسان بس وربي ماني قادره أفكر بشي إيجابي وحياتي كلها سلبيه ..

حتى بصلاتي أدعي ربي بأنه ياخذ روحي ويريحني من حياتي لانوم ولا أكل ولا وساعة صدر ولاحظ مبتسم ولا أقارب يفتحون النفس إذا تركناهم وبعدنا عنهم يلحقونا بالشر وإذا حاولنا نحل أمورنا يخربون علينا بيدينهم ورجلينهم وشغلهم الشاغل السؤال عني وعن أحوالي والتشمت والنميمه والبهتان والفرح بمصيبة غيرهم ..

أستاذي أنا ماأطلع ألا مع أمي وزي ماقلت لك أمي كلما أقولها يمه أحس أني مقهوره وأجلس أصيح أو لمن يوجعني ظهري أو رأسي تقرا علي وتقولي كلام يرفع معنوياتي زي كل شجره مثمره تقذف بحجر ومن هالحكي حتى أني أرحمها أخاف يجيها شي من أللي فيني ..

التفكير ماني قادره أغيره وربي تعبت تعببببببت لأن مخي تعبان تجي حياتي قدامي وتجي المواقف الشينه قدامي على شكل ومضات كلما جلست لحالي أو جيت أبرقد..

ههه اليوم ضحكتني وربي مت ضحك عليها ياحبي لها كنت أسولف معها العصر وأبي أقنعها بسالفة ألأخصائيه النفسيه أقولها يمه أحس أني أتكلم مع وحده بعد كل صلاة قالت لي هااااو وش تقولين لها؟ قلت أقولها أبعدي عني وأشوفها تقرب مني قالت لااااايابنيتي أجل تصالحي أنتي وياها خليها تجي نشرب معها القهوه والشاي مايجوز العداوه!!! ههه ياقلبي قلبها والله اللي مريحه نفسهادنيا وآخره ..

وش أسوي أنا تعبانه وبحيره من أمري ؟؟

والله ياأستاذ فهد أني أشكرك من كل قلبي تصدق أن نفسيتي زانت شوي يوم لقيت أحد معي ويوجهني ويعرف اللي بداخلي وصرت أشوف بعض مشاكل الناس وتهون مشكلتي قدام مشاكلهم *خلق الأنسان في كبد*

ياااااارب يحفظك ويخليك ويعطيك مثل ماتعطي المحتاجين من توجيه وإراده وراحه نفسيه

فمان الله