kurapica

رسالة غريبة... من جربها

السلام عليكم و رحمة الله و بركاته...

بقولكم قصة غريبة صارت معي شخصيا ...

مرت فترة من الزمن صارت مشاحنة بيني و بين أبوي .

و قعدت فترة من غير ما أكلمه ... يعني تقريبا اسبوعين.

نوعيتي إني إذا زعلت أرفع الجام ليوم واحد.

لكن ابوي يرفع الجام لأشهر ..

كل مرة أحاول إني أتقرب منه عشان أطيح الحطب , لكن للأسف

كأني أدور على ابرة في كومة قش

لكن يوم من الأيام .... قعدت ابروحي و قبل النوم. و سويت لي فلم هندي ..

سويت لي قصة بخيالي ...

تدرون وش هي؟؟؟

تخيلت

إني كنت طالعة مع صديقاتي و سوينا حادث ( اسم الله علينا . الله لا يقول)

و إني مت ( بعد عمر طويل إن شاء الله)

و لفوني بالكفن ... و صرت أحاول إني أقول كلمة حق أبوي أتسامح منه . لكنه دفني و هو معصب علي .

وصرت أبكي ( بالصج. مو بالخيال ) و أقول بنفسي :

يبا سامحني ... و الله ما كان قصدي . بس ألحين شلفايدة بعد ما مت؟

و تخيلت حياة ما بعد الموت ......

و الحمد لله الله من علي بالجنة ... لكن ... إللي ما خلاني أدخلها غضب أبوي علي.

و صارت السالفة صج .. تخيلت إني صج هناك . و انترست المخدة بالدموع .

و فجأة .... قطع فلمي الهندي ... مسج من أبوي ( دليل على الرضا)

و أخيرا رجعت المياه لمجاريها .

استغربت قلت : اشلون أبوي درى باللي أفكر فيه لأن كان محتوى الرسالة تقريبا فيها من تخيلي ...

اشلون ؟؟؟

رسالة غريبة وصلها ربي لأبوي و طيح الحطب .

الحمد لله

و رسالتي لكم :

إذا صارت لكم سالفة مثل سالفتي

تخيلوا هالمشهد بصدق المشاعر . و اندموا على ما فات

و ربي كريم . ما يخيب ظن عبده فيه .

تجربة صارت لي . أنشرها لكم للإفادة .

لكن مو معنى هذا إن تزلق الوايرات يشتغل من اليوم ...

تحاشوا غضب الوالدين ... و إذا صار ما صار حاولوا بطريقتي ... و ربي يتمم إللي
فيه الخير


الله لا يحرمنا من ضحتكم الحلوة

المصدر: نفساني