نفساني - عرض مشاركة واحدة

01-08-2005, 08:38 AM

السلام عليكم ورحمة الله وبركاته

أول شي بقوله مشكور أخوي الحوراني على موضوعك..

ثاني شي منتداكم بصراحه يجنن أحس أني بديت أقضي فيه أوقات جميله ومفيده..

ثالث شي بقولكم عن خوياتي :

أنا كل مكان أروح له لازم أكون فيه علاقات سواء كان مدرسه جامعه عرس عزيمه سوق ..

كنت ساذجه وأعطي أي أحد سري وأشكي له ولمن أنهيت المرحله المتوسطه سويت جرد عليهم ولقيت أن القليل منهم هم اللي يستحقون كلمة صديق صدوق قليل جداً..

لا أنكر أني أنجرحت كثير وأنظلمت كثير وأستقليت أستقلال مادي ..

واللي أتمنى أذكرهم هنا هم خويات عمري من الطفوله مستحيل أتخلى عن أي وحده فيهم وناشبه لهم نشبه وهم أكثر مما يقال عنهم كلمة الصداقه..

ساعدوني بكل شيء وبكل ظروفي سمعو لشكواي بكو لبكائي ضحكو لضحكي ورأيت تضحياتهم بكل شيء *مرت علي ظروف الزمتني الفراش بالمستشفى وكانو يزوروني ويعرفون أمهاتهم على أمي وكملو لي دفاتري جميعها ووووو...إلخ

لي خويات بكل الأعمار وبكل المناطق 2 يحضرون الدكتوراه و1 مدرسه و2 معاي بالجامعه طبعاًمن الطفوله للجامعه وحنا نموت بعض ضحك وقت المحاضرات وكثير يسموننا الضاحكات من كثر ضحكنا بس دايم نذكر بعض بالصلاة وإذا وحده جت تحش نمسكها مع علباتها ..

ولكن لم ولن أرى أصدق من الأنسانه اللتي ربتي الأنسانه اللتي وقفت بجانبي بكل حنان ورحمه الأنسانه اللتي تقول خذي مني كل شي مال حب حنان ولكن أجعليني أراكي مبتسمه ..هي أمي أطال الله بعمرها وجعلها سنداًلي دنيا وآخره ياكم عذبتها بحزني وبغموضي وبهدؤي القاتل عندما يكون شي بخاطري ..

للمعلوميه محد من أقاربي أعده صديق لي لأن القريب ينخاف منه وصداقته يجب أن تكون سطحيه ..<<أسأل مجرب

أمممم وش بعد إيه أذكر بثالث ثانوي كان محلي أنا وخويتي(س) بأول الفصل وكانت حصة الأحياء وتشرح المدرسه أنا جا بمسمعي أسم غريب ويضحك قمت ضحكت وسكت وخفت من المدرسه أنها تزعل علي لأني ضحكت بوسط الدرس قمات قالت المدرسه من ضحك ولا تكلمت سكت قالت من ضحك ولا وربي بنقصكم كلكم يالله قولو قالت (س)أنا ياأستاذه ضحكت أناآسفه وكم مره أصير تعبانه وتكتب عني الواجب وكم مره تفزع معي برأيي وهالحين صرنا بالجامعه وأهلنا يعرفون بعض ..

وكنا نشتري لبعض نفس اللبس ونفس قصات الشعر ونفس المريول والجزمه أعزكم الله وعندما تنادي المديره وحده مننا لازم الثانيه ترافقها لدرجة أن المديره كانت تسمينا التوأم المتلاصق هههه وكم مره نتلاصق بالراس قدام المديره وتموت ضحك علينا خصوصاًأيام ثالث ثانوي جتنا جرأه خياليه حتى مع المدرسات لدرجة أن الواجب نفس الحل ولو الخط نفسه كنا غريبات بنظر الكل وأغلب المدرسات يهاوشونا على تلاصقنا ههه مره مدرسة الكيمياء بثاني ثانوي قالت لنا إذا ماتغيرتو بجيب دكتور فهد الربيعه يفصلكم ..

وأزيدكم من الشعر بيت من شدة تعلقنا في بعض ؛هي كانت تروح مع السواق والخادمه للمدرسه وأنا كذلك وصرنا نرجع مع بعض يوم بسيارتي ويوم بسيارتها وأخذنا هواش من أهلنا وأنحل الموضوع بأننا نروح مع بعض بسياره وحده ومعنا الخدامات وكل يوم على ذالحال الصباح والظهر وأزيدكم من الشعر بيت أذكر أيام المتوسط جمعنا أنا وهي 5000 ريال وفتحنا حساب وصرنا نحط المكافآت مع بعض ولليوم وأبوي وأبوها دخلو شراكه في بعض المشاريع وسافرنا عدة مرات معهم ..

لكن مشكلتي أني ماأشكي لها رغم أنها تحس بحزني وتبكي بعض المرات وتتوسلي أقولها وش بخاطري وتتهمني بأني غامضه وماأبوح لها وأني أعدها زميله فقط بس أنا ماأحب أضايق أحد أبد أبد أبد..

والله يديم المحبه ونصيحه لكل أخواني بالمنتدى لا تعطي قبل ماتاخذ وأختبر خويك لو حسيت أنه مخادع أو يستهين بك..

أعيد شكري لك أخي الحوراني

فمان الله