انا بنت عمري 26 سنة
و متخرجة من الجامعة من 3 سنوات
و حصلت على شهادة بكالوريوس + دبلوم عالي
و مع هذا انا عاطلة عن العمل صار لي 3 سنوات قدمت اوراقي في كللل مكان و أبوي الله يحفظه كلم لي ناس وايد (واسطات) ينادوني لمقابلات و إمتحانات ولا رد بعد ذلك
أعيش مع أمي و أبوي و أخوي(موظف) و عندي خوات2 متزوجات يعني وحيدة في البيت خصوصاً بالليل
و أموت من القهر وانا اشوف من هم تخرجو بعدي يتوظفون حال تخرجهم و تخصصهم مثلي بالضبط
أحس بإحباااااااااااااط شديد
خصوصاً أن من أحلامي وانا طالبة أن اكمل الدراسات العليا و احصل على الماجستير و الدكتوراة لكن ظروفي المادية ما تسمح لي بذلك لازم اتوظف على الأقل علشان اقدر اصرف على دراستي على الرغم من الكلام اللي اسمعه من الي حولي و اللي هم تعبو و خذو شهادات عليا لكن لم يحصلو على التقدير اللي كانو ينتظرونه
أحس نفسي مشتته جداً ما بين الظلم و الفساد اللي اشوفه مستشري و بين الفراغ اللي اعاني منه
أنا عارفة انكم بتقولون لي خذي دورات = مارسي هواياتك = حفظي قرآن = روحي لمحاضرات دينية = و .................. الخ
انا عارفة كل هذا الكلام
أولاً الدراسة و المحاضرات و الحفظ و كل هذه الأشياء كرهتها و كرهت طاريها و تعقدت من الجامعة ، أحس نفسي اني كنت اطير فوووووق و أحلم احلام وردية و فجأة ................. طحت على أرض الواقع على الرغم اني ما كنت خيالية والله العظيم أحلامي كانت ما تتعدى ان اتوظف و اكمل دراساتي العليا و أفيد المجتمع و أن يكون لي أسم و يفتخرون أهلي فيني ماظن هذي مستحيلة و كل بنت تحلم نفس أحلامي يعني كنت واقعية ما كنت خيالية
ثانياً : ما اعرف شنهي هواياتي بالضبط !!!! بالفعل مادري شنهو أحب ؟ أحب اشياء وايد لكن ما فيه شي محدد ما عندي شي اضيع وقتي فيه، بصراحة أنا اخجل من نفسي لأنه على رغم سني 26 و لحد الآن ماقدر احدد الشي اللي أحبه، أيام ما كنت أدرس بالجامعة كنت احب اجمع الجرايد و كان عندي عدد هائل منهم و كنت اخطط اني اسوي لي ارشيف بهم لكن لما تفرغت و جيت انفذ اللي بــبالي شفت ان الكمية هائلة و كانو كلهم مغبرين مليت بسرعة و رميتهم كلهم
تجيني فترات أحب الخياطة و اروح اشتري الأدوات و اجمع في الخام و فجأة أحس بملل
مرات احب اني ارتب البومات الصور و مرات انسق و اجمع في الشموع ومرات أحب الطبخ ............. هكذا و مرات أفكر اسوي حوار مع امي او ابوي و اسجله و أفرغه و اخليه للذكرى لأني جربت هذي الفكرة مع خالتي و نجحت لكني اتكاسل خصوصاً لما اشوف امي و ابوي مشغولين ولا هم بفاضيين لتفاهاتي
كل هذي الأشياء تزيد من الإحباط فيني أحس ان ما لي هدف ، أشعر بالحرج من أهلي لأنهم يشوفوني غارقة في جمع الشموع مثلاً أو شراء أدوات الخياطة و فجأة أتراجع
صرت ما أحب اطلع من البيت أبداً ولا احب اجتمع مع الناس على الرغم من اني قبل ذلك كنت على العكس تماماً سبب حبي للعزلة هو أني كل ما اشوف أحد يسألوني : توظفتي؟ليش؟مارحتي راجعتي؟ووووو الخ هذي الأسئلة صرت أكرهها جداً جداً ما احب احد يشفق علي خصوصا لما يجي السؤال من بنت أصغر مني و موظفة
والله العظيم و الله يعلم بمقدار الطاقة اللي فيني
ودي اني احقق شي
ودي اكون فاعلة
ودي يكون عندي عمل
ودي اني اكون مشغولة جداً
والله ان نفسيتي متعبة جداً لأن اشوف عمري 26 و لحد الآن لم أحقق شيء و اللي في عمري خلصو الماجستير و الحين في الدكتوراة و انا الى الآآآآآآآآآآآن محلك سر
الحمد لله اني ما افكر في الزواج يعني موضوع الزواج ما اتحسس منه عادي عندي الوظيفة و تحقيق الذات هو همي الوحيد و شغلي الشاغل
تتعب نفسيتي لما احسب السنوات اللي مرت علي دون ان أنجز شيء ، ضاعت سنوات طويلة وانا بإنتظار الوظيفة و من غير لا استفيد شي منها
بداية تخرجي أشغلت وقتي بممارسة الرياضة في نادي + عملت ريجيم و نزل وزني حوالي 13 كيلو و كانت نفسيتي و مزاجي رااااااااااااااااااااائع و مرتاحة
لكني الحين ما احب اختلط بأحد لذلك ما افكر اني اروح للرياضة مرة أخرى بالإضافة إلى أني كرهتها لانها خربت لي جسمي
صرت أخاف من الفشل حالياً أفكر اني اشتري لي جهاز المشي للبيت لكن أهلي يقولون انه راح تركنينه بعد فترة (عقدتهم معاي هم عارفين ان اهتماماتي مثل البلونة تنفجر بأي وقت)
و كذلك أفكر اني اشتري مكينة خياطة لكن دائما أخاف من نظرة أهلي مع انهم و الشهادة لله ولا مررررة قالو لي شي أو حسسوني بشي لكن نظراتهم تحمل الكثير من الكلام
قرأت موضوعات كثيرة عن تحقيق الذات و أحيانا أتابع قناة سمارتس واي لكن أشعر كلامهم كله مثالي و خيالي و دوراتهم غالية جداً جداً
كذلك دخلت موقع صنّاع الحياة = عمرو خالد لكني شفت ان كل المشاركين أصغر مني خجلت اني اسجل في منتداهم لأني أكبر منهم
ماذا أفعل ؟
أدري ان الحل بيدي لكن أريد مساعدة منكم
تعبت
أيامي تمر كلها زي بعضها
أحيانا أخرج مع صديقاتي و استمتع معاهم لكن لا استطيع الخروج يومياً بحكم انشغال صديقاتي بأعمالهم + ابناءهم و ازواجهم
صرت أسهر للفجر أو للصباح أنام حوالي 6 صباحاً و اصحى من النوم 2 الظهر اقرأ الجرايد تقريباً ساعتين أجلس مع امي و أخواتي إذا كانو في زيارتنا و من بعد صلاة العشاء افتح النت و التلفزيون و أجلس مع المنتدى (مشتركة بأحد منتديات البنات) و بيدي جهاز التلفزيون أغير المحطات المملة و اقلب صفحات النت
و الله حياتي مملة ولا لها طعم أبد
ودي أعدل أوقات نومي
ودي اصحى من النوم 8 او 9 ص
حاولت أكثر من مرة ما قدرت
حاولت اني اصحى من الصبح و ما انام الظهر و أواصل لحد الليل لكني فشلت لأنه يصيبني أرق على الرغم من التعب الذي أشعر به الا انني ما اقدر انام أو اني إذا نمت مثلاً 11 مساء و لما اصحى لصلاة الفجر خلاص ما اقدر انام بعدها
الشي الوحيد الي أحمد ربي عليه وايد هو اني على الرغم من الفراغ اللي أعاني منه إلا اني محافظة على نفسي و لله الحمد ، بنات وايد يحسدوني على اللي عندي، و ناس كثار لما يشوفون اللي عندي يظنون اني (...................) عندي سيارة خاصة فيني + كمبيوتر + تيلفون بغرفتي + جوال + تليفزيون = لكن الحمد لله رب العالمين عمري ما استخدمت هذي الوسائل في شيء يسيء لأخلاقي و لشخصي و اعتقد ان الكل يفهم ما أقصد
لكن مثل ما قلت لكم اللي أعاني منه
نومي مخربط
و حياتي روتينية
ولا ني عارفة شلون اصلح حياتي
عطوني حلول جدية و غير خيالية أقدر أني أطبقها
شلون احدد لي هواية معينة؟؟؟
شلون أقضي وقت فراغي؟؟
دلوني على مواقع مفيدة تفيدني
أرجوكم لا تهملون معاناتي
أنتظركم بفارغ الصبر