|
ساعديتي يا دكتوره بينهدم بيتي
السلام عليكم يا دكتوره
مشكلتي اني زهقت من المشاكل من كثرة الشك
انا وزوجي خذينا عن بعض على حب وفي مشاكل بيني وبين اهله بسبب العادات والتقاليد (بدو) اوهم اهله انه طلقني بس في الواقع مازلت على ذمته واحبه حب الله العالم شنو حبه بداخلي وانا واثقه من حبه لي استمر زواجنا اربع سنين وماعندنا عيال والسبب النسل.
اكتشفت زوجي انه يخوني وصارله سنتين ونص تقريبا والسبب مرض النزوه اللي بداخله واوهمني انه انهى العلاقه وبعدها استمر معاها وكان يوهمني من شكي انه مو بمحله واني هاوية مشاكل واني نكديه وكنت اشوف تصرفات تأكدلي انه مازال يخون بس بعصب ويزعل ويوهمني اني مريضه واني شكاكه وبعدها اكتشفت انه مازال يخون مع العلم ان قايل لصاحبته انه مطلقني بس اتصلت على البنت وقلت لها اني زوجته وصدقتني وانهت علاقتها مع زوجي.
حسيت بالندم على زوجي باللي سواه معاي والاستغفال والكذب سامحته بس ماني قادره اثق فيه كل ماشفت التليفون انتظار شكيت تبين بصراحه انا كثير راميه نفسي عليه احس انه زهق مني.
وصدقيني مااقدر اتخلى عنه وبنفس الوقت ماارضى على الخيانه مره ثانيه.
اللي اطلبه منج يادكتوره ابي اغير طريقة تعاملي معاه اشلون اتغلى عليه واثقل وألفت انتباهه.
شنو الكلام اللي لازم اقوله له عشان يتأثر بوضعي وخصوصا ان اهله مايعرفون عن وجودي معاه
أبيه شلون يلاحقني مثل ما ألاحقه مع العلم استحاله يبين لي مشاعره ويستحي يقولي كلام حلو بس صدقيني واثقه من حبه لي بس عيبه دايما يتغلى ويعطيني ظهره.
ودايما أسأله مثل التحقيق قام يزهق من اسألتي.
ابي اطنشه بأسلوب احسسه اني احبه وبنفس الوقت مايهمني.
ابيه يخاف على زعلي ويخاف علي انه يخسرني وابيه يستغرب اني ماعدت زوجته اللي يعرفها من طريقة تعاملي معاي وخصوصا لاطال غيابه أو بوقت الزعل لأني مثل الهبله اذا زعلت منه اقسى عليه بكلام جارح وبعدها اقعد اراضيه وهو يكبر راسه علي ويحسسني انا الغلطانه.
ابي اغير شخصيتي قدامه تكفين يادكتوره.
ماأبي حياتي تنهدم والسبب شكي ونكدي واسألتي مثل التحقيق
وابي اعطيه فرصه اني اثق فيه بس ماني قادره.
ابي استرجع زوجي مثل ماطان يحبني بعد ماطفشته من ايديني بطريقة اسلوبي وتعاملي معاه.
اتمنى انج تنقذين حياتي
واذا مافي أي مانع تردين علي برساله خاصه.
|