يابحر كم ترمي همومك على ساحلك = لاضاق صدرك يفيض الموج من كل جال
وانا لك الله همومي لو تبي تاصلك = تدري وش يصر بك تصبح تشد الرحال
قالوا لي ان ضاق صدري اجيك واقابلك = من شان يرتاح بالي وجيت والحال حال
جيتك وكل الأسى ملقى على كاهلك = تزفر زفير وتصافق كن صابك هبال
يابحر زودت همي هم وهم بسألك = وشهو له الهمّ وكنوزك تفوق الجبال
ياكم وياكم تمنيته يدور الفلك = ويزين حظي وضاع العمر رهن احتمال
يابحر ماجيتك استرضيك واجاملك = لو شفت حالي فقير ولا بجيبي ريال
مابي كنوزك عسها تحرقك باكملك = ما يوم عرضت أنا وجهي لذل السؤال
وان كان بيّت لي غدرك فانا مااجهلك = أعوذ بالله من غدرك وقهر الرجال
ما قصدي الا أخوضك واسبرك واشغلك = وابحر في آفاق ماتقدر تصلها محال
إبحار موجك يقف لا اشرف على ساحلك = لك حد فاصل وانا ما حد فكري مجال

المصدر: نفساني