الى كل المستشارين والأعضاء السلام عليكم..

أولا وقبل كل شي أود أن ابدي اعجابي الشديد بكم وبكل ما تقدمونه من نصائح غاليه.

أنا عندي مشكله عويصه محيرتني وأبغى منكم النصح والمشوره.


في البدايه خلوني أعرفكم على نفسي. أنا بنت سعوديه "نجديه" من عائله معروفه، عمري ثلاثين سنه، متخرجه من الجامعه وموظفه في شركه، غير متزوجه على الرغم من انه تقدم لي أكثر من شخص ولكن لسبب او غيره ما يتم النصيب.

على الرغم أني ماني مقتنعه بطريقة الزواج التقليدي اللي يتم عن طريق الأهل، الا انها هي الطريقه الوحيده المتاحه في مجتمعنا ولذلك عمري ماتوقعت أو جا على بالي اني ممكن أرتبط بشخص بعد علاقة حب، لدرجه اني تقريبا كنت شبه مقتنعه ان الحب انقرض من هذا الزمن.
وغير كذا، خلال عملي مروا علي عالم أشكال وألوان، لكن عمر ماأحد فيهم لفت أنتباهي أو خلاني أفكر مجرد تفكير ان ممكن يتم شي.


المهم، بعد ما توظفت بسنه تقريبا، قابلت شخص غير حياتي تماما. من أول مره قابلته فيها حسيت باحساس غريب يشدني له واستمر هالاحساس الغريب اللي عجزت افسره او اعرف معناه لمده ثلاث سنوات تقريبا. خلال هالثلاث سنوات كنت أحيانا أحتك فيه من خلال شغلي، وكل ما أتعامل معاه أكثر كل ما أعرفه أكثر وكل ما يزيد هالأحساس الغريب عندي. نفس الشي كان قاعد يصير معاه ولاهو عارف له اي تفسير.
أستمرينا على هالحال الى قبل سنه تقريبا لمن عرفنا وتأكدنا ان هالاحساس اللي بيننا ماهو الاعلاقة حب طاهره وبريئه (ويشهد الله على انها كانت ولاتزال علاقه صادقه وطاهره من خلال العمل فقط)

فيه أشياء كثيره مشتركه بيننا، شخصياتنا، أفكارنا، مشاعرنا، حتى طريقة تفكيرنا، حصلت مرات كثيره أني أفكر في شي وبعد شوي ألقاه مسويه والعكس (وهذا الشي اللي كنت دايم أسمع فيه ولاعمري صدقته اللى ماجربته بنفسي). من الصوت كل واحد يقدر يفهم الثاني ايش يبي يقول او ايش قاعد يفكر فيه. لو لفيت الدنيا يستحيل ألقى واحد يفهمني مثله. نحب بعض حيل و كل واحد مننا ما يقدر يتخيل حياته من غير الثاني، وهدفنا الوحيد في هالدنيا اننا ننتزوج ونكون لنا أسره صغيرونه.


المشكله الوحيده في الموضوع انه على الرغم من كثرة الاشياء المشتركه بيننا الا انه فيه شي واحد مختلف بيننا وهو الجنسيه. على الرغم انه عايش في السعوديه طول عمره الا انه مو سعودي ولا حتى عربي ولكنه مسلم (لاتروحون لبعيد تراه مو أمريكي ولا بريطاني). وأنتم عارفين نظرة مجتمعنا لمثل هالمواضيع!!

أحبه حيل ولا اقدر اتخيل حياتي من غيره ولا اقدر اتخيل اني ارتبط بشخص غيره. وفي نفس الوقت ما أدري كيف أفاتح أهلي في الموضوع ولا كيف أقنعهم، وحتى اذا اقتنعوا بأي طريقه كيف بأعيش في هذا المجتمع وكيف بأتحمل نظرات الناس وأسألتهم. أحيانا أفكر ايش ذنب أهلي ادخلهم في مشاكل هم في غنى عنها ولكن في نفس الوقت أنا ايش ذنبي اعيش محطمه طول عمري وأخسر حب حياتي. يعني على راي العندليب بعدك نار وقربك نار.

أحيانا نفكر انه ممكن نتزوج وبعدين نسافر نعيش في اي مكان برا، لكن ما أقدر اتحمل فكرة الغربه طول عمري ولا اقدر اتخيل اني اعيش بعيد عن أهلي على طول.


أنا جدا محتاره ولا أدري ايش اسوي، أنصحوني، هل أتبع قلبي واحارب الدنيا علشان الشخص الوحيد اللي قدر يدخل قلبي، والا اترك حلم حياتي علشان المجتمع اللي انكتب علي اني اعيش فيه.

المحتاره جدا جدا جدا
جوري